Вашингтон. 4 наурыз. ИНТЕРФАКС – АҚШ пен Израильдің әуе соққылары Иранның баллистикалық зымыран бағдарламасына қатысты кейбір кәсіпорындарға айтарлықтай залал келтірген. Бұл туралы спутниктік суреттерді талдауға сүйене отырып, The New York Times (NYT) хабарлады.
«NYT жүргізген талдау баллистикалық зымырандарға қатысы бар жер үстіндегі бірқатар нысандарда қирау белгілерін анықтады. Кейбір объектілерде зақым айтарлықтай. Мәселен, Керманшах маңындағы зымыран нысанында бірнеше ғимарат қираған», – деп жазды басылым.
Иранның солтүстігіндегі Альборз провинциясында орналасқан Гермдерре кешені аумағында 28 ақпаннан бастап екі рет жасалған соққы нәтижесінде кемінде тоғыз ғимарат зақымданған. Сонымен қатар Исфахан маңындағы зымыран нысандары да шабуылға ұшыраған. Олардың қатарында 2025 жылғы маусымдағы соққылардан кейін қалпына келтіру жұмыстары жүргізілген объект те бар.
Сонымен бірге NYT Ирандағы зымыран зауыттарына келтірілген залалды спутниктік суреттерден өзге деректер арқылы растау мүмкін болмағанын атап өтеді.
Басылым жексенбі күні АҚШ Қарулы күштерінің Орталық қолбасшылығы Иранның зымыран бағдарламасына қатысты бекіністі нысандарға соққы беру үшін B-2 бомбалаушы ұшақтары қолданылғанын растағанын еске салды. Бұл ұшақтар GPS немесе лазерлік бағыттау жүйесі арқылы дәлдейтін BLU-109 бункерге қарсы бомбаларын алып жүре алады.
