Астана. 4 наурыз. ИНТЕРФАКС-ҚАЗАҚСТАН – Қазіргі уақытта Таяу Шығыстағы шиеленіс аймағынан шамамен 1 мың Қазақстан азаматы эвакуацияланды. Бұл туралы ҚР Сыртқы істер министрлігінің ресми өкілі Ерлан Жетібаев мәлімдеді.
«Бүгінгі күнге дейін шиеленіс аймағынан 946 отандасымыз шығарылды. Жақын арада Маскаттан Алматыға 314 жолаушысы бар рейс келеді. Кейін дәл осы бағытпен шамамен 230 азаматтан тұратын екінші топтың ұшуы жоспарланып отыр», – деді Жетібаев СІМ-де өткен брифингте.
Осылайша, Оманнан Қазақстанға 500-ден астам азаматтың оралуы күтіледі.
Ол қазіргі уақытқа дейін Қазақстан азаматтарының арасында зардап шеккендер немесе қаза тапқандар туралы ақпарат түспегенін атап өтті.
Сонымен қатар бүгін Жидда – Атырау және Жидда – Ақтау бағыттары бойынша эвакуациялық рейстер ұйымдастыру жоспарланған. Бұл рейстермен 326 Қазақстан азаматы елге оралады.
