Астана. 5 наурыз. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күні өткен пленарлық отырыста «Қазақстан Республикасының Үкіметі мен Австрия Республикасының Федералдық Үкіметі арасындағы заңсыз жүрген адамдарды реадмиссиялау және транзиттеу туралы келісімді ратификациялау туралы» заңды мақұлдады.
Бұған дейін заңды Мәжіліс қабылдаған. Осылайша құжат Парламентте толық мақұлданып, Президенттің қол қоюына жолданды.
Сенаттың конституциялық заңнама, сот жүйесі және құқық қорғау органдары жөніндегі комитетінің қорытындысына сәйкес, заңның мақсаты – заңсыз көші-қонға қарсы іс-қимыл саласында Қазақстан мен Австрия арасындағы тиімді ынтымақтастықтың құқықтық негізін қалыптастыру. Сондай-ақ екі ел аумағына кіру немесе онда болу талаптарына сәйкес келмейтін не бұл талаптарды бұзған тұлғаларды анықтау және оларды қауіпсіз әрі реттелген тәртіппен қайтарудың жедел рәсімдерін енгізу көзделеді.
Атап айтқанда, келісімде негізгі ұғымдардың нақты анықтамалары белгіленген. Мысалы, «азамат», «үшінші мемлекет азаматы», «азаматтығы жоқ адам», «заңсыз жүрген тұлға», «сұрау салушы тарап» және «сұрау салынатын тарап» сияқты ұғымдардың мазмұны айқындалған.
Сонымен қатар тараптардың өз азаматтарын реадмиссиялау жөніндегі міндеттемелері бекітіледі. Бұдан бөлек, үшінші мемлекет азаматтары мен азаматтығы жоқ адамдарды реадмиссиялау шарттары мен негіздері белгіленеді. Бұл талаптар мемлекеттердің бірінің аумағына кіру, болу немесе тұру шарттарын орындамаған немесе оларды бұзған тұлғаларға қатысты қолданылады.
Келісімде тұлғаларды сәйкестендіру рәсімдері де реттелген. Олардың қатарында азаматтығын құжат арқылы растау, әңгімелесу жүргізу және әртүрлі деңгейдегі дәлелдерді пайдалану қарастырылған.
Құжатта дербес деректердің қауіпсіздігін қамтамасыз ету бойынша қатаң кепілдіктер көзделген. Оның ішінде рұқсатсыз немесе заңсыз өңдеуден, сондай-ақ кездейсоқ жоғалу, жойылу немесе бүлінуден қорғау шаралары бар.
Сондай-ақ келісімде реадмиссияға байланысты қаржылық міндеттемелер, оның ішінде тасымалдау және транзит шығындарын бөлу тәртібі айқындалған.
Келісімді іске асыруға уәкілетті органдар ретінде Қазақстан Ішкі істер министрлігі және Австрияның Федералдық ішкі істер министрлігіне қарасты Иммиграция және баспана мәселелері жөніндегі федералдық ведомство белгіленген.
Қазақстан бұған дейін реадмиссия туралы ұқсас келісімдерді 21 мемлекетпен жасасқан. Олардың қатарында Қырғызстан, Тәжікстан, Өзбекстан, Ресей, Германия, Швейцария, Чехия, Латвия, Литва, Норвегия, Беларусь, Венгрия, Бельгия, Нидерланд, Люксембург, Молдова, Польша, Эстония, Сербия, Франция және Италия бар.
Келісімді ратификациялау заңсыз көші-қонға және трансшекаралық ұйымдасқан қылмысқа қарсы күрес мәселелері бойынша екіжақты ынтымақтастықты нығайтуға, сондай-ақ халықаралық құқықтың жалпыға танылған қағидаттары мен нормаларына сәйкес қауіпсіз реадмиссия рәсімдерін қамтамасыз етуге мүмкіндік береді.
