Париж. 5 наурыз. ИНТЕРФАКС – Францияның Қарулы күштер министрі Катрин Вотрен Париж Біріккен Араб Әмірліктеріне қосымша алты Rafale жойғыш ұшағын жібергенін мәлімдеді.
«Біздің келісім аясында Әмірліктерде бұған дейін де Rafale ұшақтары болған. Қосымша алты Rafale ұшағы БАӘ-ге жіберілді және олар қазірдің өзінде жетті», – деді министр RTL радиостанциясының эфирінде.
Иран тарапынан атқыланған БАӘ-дегі екі әскери база туралы айта келе, Вотрен олардың нақты нысанаға алынған-алынбағаны әзірге анық емес екенін атап өтті. Оның айтуынша, бұл базалар ірі әскери кешендердің құрамына кіреді. «Қазіргі уақытта Францияның өзі нақты нысана болғаны туралы дәлел жоқ», – деді министр.
Сондай-ақ ол шабуыл салдарынан ешкім зардап шекпегенін және базалардың қалыпты режимде жұмысын жалғастырып жатқанын айтты.
Францияның қорғаныс ведомствосының басшысы Таяу Шығысқа қосымша әскер жіберу мәселесі күн тәртібінде жоқ екенін де атап өтті.
Оның айтуынша, Францияның Таяу Шығыстағы қақтығысқа қатысты ұстанымы «қатаң қорғаныс сипатында». «Франция соғысқа қатысып отырған жоқ. Біз қорғаныс позициясын ұстанамыз және шабуыл жасамаймыз», – деді Вотрен.
