Мәскеу. 5 наурыз. ИНТЕРФАКС – АҚШ-тың Халықаралық сауда мәселелері жөніндегі федералдық сотының судьясы Ричард Итон ел президенті Дональд Трамптың әкімшілігіне өткен жылы енгізілген жаһандық импорттық баждар есебінен жиналған 130 млрд доллардан астам қаржыны импорттаушыларға қайтару рәсімін бастауды міндеттеді.
Ақпан айында АҚШ Жоғарғы соты Трамптың 2025 жылы көптеген елдерден импортталатын тауарларға баж салығын енгізу туралы шешімін заңсыз деп таныған болатын. Судьялардың пікірінше, 1977 жылы қабылданған Халықаралық төтенше экономикалық өкілеттіктер туралы заң (IEEPA) мемлекет басшысына мұндай баждарды енгізу құқығын бермейді.
Осы шешімнен кейін көптеген компаниялар сотқа талап арыз берді. Олар бұған дейін Жоғарғы сот шешіміне дейін-ақ шағым түсірген жүздеген компанияға қосылды. Жалпы алғанда, 2 мыңнан астам талап арыз тіркелген. Олардың қатарында FedEx, Costco, Goodyear, Pandora және Barnes & Noble сияқты ірі компаниялар бар.
Судья Итон АҚШ-тың Кеден және шекара қызметіне төленген баждарды қайта есептеп, күшін жойған баждарды есептен шығара отырып, импорттаушыларға өтемақы төлеуді тапсырды.
БАҚ мәліметінше, Трамп әкімшілігі бұл шешім дереу күшіне енбеуі үшін оған апелляциялық шағым түсіруі мүмкін. Сәрсенбі күні АҚШ Әділет министрлігінің өкілі судьядан шешімнің күшіне енуін шағым қаралғанға дейін кейінге қалдыруды сұраған, алайда бұл өтініш қабылданбаған.
