Астана. 6 наурыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев 15 наурызда жаңа Конституция жобасы бойынша өтетін жалпыұлттық референдумда азаматтар елдің тағдырын айқындайтын шешім қабылдайтынын мәлімдеді.
«Бүгінде біз біртұтас ұлт ретінде маңызды тарихи кезеңге келіп жеттік. Алдағы жалпыұлттық референдумда халық елдің болашағын айқындайтын таңдау жасайды», – деді Тоқаев жұма күні Халықаралық әйелдер күніне арналған салтанатты жиында. Президенттің сөзін оның баспасөз қызметі келтірді.
Мемлекет басшысы жақын уақытта жаңа Конституцияның мәні мен мазмұнына жан-жақты тоқталатынын айтты.
Президенттің пікірінше, Конституция жобасында елдің орнықты дамуын қамтамасыз ететін институционалдық және құқықтық негіздер қарастырылған. Бұл өз кезегінде әділетті әрі бәсекеге қабілетті, экономикасы мықты және тұрақты Қазақстан құруға мүмкіндік береді.
«Қолданыстағы Конституция Қазақстан мемлекеті қалыптасу кезеңінен өтіп жатқан уақытта қабылданған еді. Ол кезде тәуелсіздікті сақтау, мемлекеттік билік институттарын қалыптастыру және тұрақтылықты қамтамасыз ету негізгі міндет болды. Ел жеткен табыстардың негізінде дәл осы Конституция тұр. Бұл жетістіктерге Қазақстан Республикасының Тұңғыш Президенті Нұрсұлтан Назарбаевтың арқасында қол жеткізілді», – деді Тоқаев.
Президент Қазақстан халықаралық құқықты, БҰҰ Жарғысының қағидаттарын қорғауды әрдайым қолдайтынын атап өтті.
«Бұл – Қазақстанның ұстанымы. Біздің мемлекет ұлттық заңнаманың маңызын төмендететін, оны екінші орынға қоятын нормалары бар негізгі заңға жол бере алмайды. Бұл – тәуелсіздік пен егемендікке қатысты мәселе», – деді ол.
Сонымен қатар Конституцияда Қазақстан халқының бірлігін, ұлтаралық және конфессияаралық келісімді, толеранттылықты нығайтатын нормалар қамтылғанын айтты.
Тоқаевтың пікірінше, жаңа Конституцияны қабылдау – уақыт талабы әрі мемлекет үшін маңызды міндет.
«Негізгі заң жобасы Қазақстанның берік негізі бар, айқын стратегиялық бағытпен дамып келе жатқан және болашаққа сеніммен қадам басқан мемлекет екенін көрсетеді. Әрбір норма ұлттық мүддеге қызмет етеді», – деді Президент.
