Астана. 17 наурыз. ИНТЕРФАКС-ҚАЗАҚСТАН – Көктемгі шақыру науқаны аясында Қазақстан Қарулы күштері, басқа да әскерлер мен әскери құрылымдар қатары 21 мыңнан астам азаматпен толықтырылады. Бұл туралы сейсенбі күні республиканың Қорғаныс министрлігінің баспасөз қызметі хабарлады.
«30 маусымға дейін 18–27 жас аралығындағы 21 мыңнан астам азамат әскерге шақырылады. Олардың 11 мыңнан астамы Қарулы күштерге, 7 мыңнан астамы Ұлттық ұланға, 2 мыңы Ұлттық қауіпсіздік комитетінің Шекара қызметіне, шамамен 400-і Төтенше жағдайлар министрлігіне және 300-і Мемлекеттік күзет қызметіне жіберіледі», – делінген хабарламада.
Ведомствоның мәліметінше, Қазақстанда азаматтарға шақыру қағаздары SMS-хабарламалар және электрондық үкімет порталы арқылы шақыру пунктіне келу күнінен кемінде үш күн бұрын жолданады.
Сондай-ақ Қорғаныс министрлігі әскери есепке алу процестерін автоматтандыруды көздейтін «Smart военкомат» жобасын жүзеге асырып жатыр. Жүйе әскерге шақырылушылар мен әскери міндеттілерді дербес есепке алуды, тұрғылықты жерін ауыстырған кезде автоматты тіркеуді, 17 жастағы жасөспірімдерді бастапқы тіркеуді, сондай-ақ кейінге қалдыру мен босатуларды автоматты түрде рәсімдеуді қамтамасыз етеді.
«2025 жылы осы жүйе арқылы 457 мыңнан астам кейінге қалдыру берілді. Шақыру туралы бұйрықтар электронды форматта рәсімделеді, бұл әскери қызметшілерге кредиттік каникулдар беру үшін мәліметтерді кредиттік бюроларға автоматты түрде жолдауға мүмкіндік береді. Сонымен қатар “Е-Медосмотр” жүйесімен интеграция енгізілген. Қазіргі уақытта цифрлық медициналық тексеру Астана, Шымкент қалаларында, Алматы және Батыс Қазақстан облыстарында, сондай-ақ Жетісу облысында қолданылады. 2025 жылы 17 мыңнан астам шақырылушы медициналық тексеруден цифрлық форматта өтті», – делінген хабарламада.
Министрлік сондай-ақ мерзімді әскери қызмет өткеретін азаматтарға көрсетілетін мемлекеттік қолдау шараларын еске салды.
«2023 жылдан бері 9 мыңнан астам сарбаз ҰБТ тапсырмай-ақ жоғары оқу орындарына түсті. Тек 2025 жылы бұл мүмкіндікті 3,3 мың әскери қызметші пайдаланды. Сондай-ақ 20 мыңнан астам әскери қызметші жалпы сомасы шамамен 8,8 млрд теңгеге негізгі қарыз бен сыйақы бойынша кредиттік каникул алды», – деп атап өтті ведомство.
Бұған дейін мемлекет басшысы 2026 жылдың наурыз–маусым және қыркүйек–желтоқсан айларында азаматтарды мерзімді әскери қызметке шақыру және белгіленген мерзімін өтеген әскери қызметшілерді запасқа шығару туралы жарлыққа қол қойған болатын. 17 наурыздан бастап әкімдердің орынбасарлары төрағалық ететін қалалық және аудандық шақыру комиссиялары жұмысын бастады.
Мерзімді әскери қызметтің ұзақтығы 12 айды құрайды.
