Астана. 20 наурыз. ИНТЕРФАКС-ҚАЗАҚСТАН – Қазақстанның Алматы облысындағы Алатау қаласын дамыту жобасы өзіндік қаржылық моделі бар дербес экономикалық экожүйе қалыптастыруды көздейді. Бұл туралы вице-премьер Қанат Бозымбаев парламент палаталарының бірлескен отырысында «Алатау қаласының ерекше мәртебесі туралы» конституциялық заң жобасын таныстыру барысында мәлімдеді.
«Алатау жобасы дербес экожүйе ретінде қарастырылады. Ол жеке қаржылық модельге, арнайы басқару режиміне және жаңа институционалдық негізге сүйенеді», – деді Бозымбаев.
Оның айтуынша, қалада арнайы әкімшілік және салықтық режимдер енгізу, жеңілдіктер беру және инвестицияларды қолдау мәселесінде дербестік қарастыру ұсынылады.
«Тұрақты әрі болжамды салықтық модель қалыптастырылады: салықтық преференциялар тек қаланың басым даму салаларына сәйкес келетін жаңа инвестициялық жобаларға ғана беріледі. Бұл жобалар экономикалық және әлеуметтік тиімділікке, қаланың стратегиялық құжаттарына сәйкестікке, экспортқа бағытталуына, инновациялық және экологиялық талаптарға сай болуы тиіс. Инвесторларға берілетін барлық жеңілдіктер мен міндеттемелер ашық түрде жарияланады», – деді ол.
Сондай-ақ жаңа орган – Alatau City Authority құрылады. Оның қызметін премьер-министр басқаратын кеңес айқындайды.
Заң жобасына сәйкес, аталған орган республикалық бюджеттік бағдарламалардың дербес әкімшісі болады.
«Оның бюджеті республикалық бюджет құрамында блоктық қағидат бойынша қалыптастырылып, негізінен инфрақұрылымды дамытуға және ұзақ мерзімді жобаларды қолдауға бағытталады. Жобаларды іріктеу және қаржыландыру тәртібін кеңес бекітеді. Қаланың жергілікті бюджеті ағымдағы және әлеуметтік міндеттемелерді орындауға жұмсалады. Бюджеттік дербестікке қол жеткізгенге дейін Алатау қаласының қаражатын басқа бюджеттерге алу көзделмейді», – деді вице-премьер.
Оның мәліметінше, қазіргі уақытта жалпы құны 1,8 трлн теңгені құрайтын 44 инвестициялық жобадан тұратын пул қалыптастырылған. Бұл жаңа қалада шамамен 30 мың жұмыс орнын ашуға мүмкіндік береді.
Жоспарланған мақсаттар жүзеге асқан жағдайда, 2050 жылға қарай қаланың жалпы өңірлік өнімі $50 млрд-қа жетуі мүмкін.
Алатау қаласы Алматы облысында 2024 жылғы қаңтарда мемлекет басшысының жарлығымен құрылған. Қаланың бас жоспары сингапурлық Surbana Jurong компаниясымен бірлесіп әзірленген. 2025 жылғы қыркүйекте президент Алатауға ерекше мәртебе беру туралы жарлыққа қол қойған.
Жоспар бойынша «Алатау Сити» өңірдегі толық цифрландырылған алғашқы қалаға айналмақ: смарт-сити технологияларын қолданудан бастап тауарлар мен қызметтерге криптовалюта арқылы төлем жасауға дейінгі мүмкіндіктер енгізіледі.
20 наурыздағы ресми валюта бағамы – 1 доллар үшін 482,32 теңге.
