Астана. 5 мамыр. ИНТЕРФАКС-ҚАЗАҚСТАН – Қазақстан Үкіметі жеті өңірдегі жылу және электрмен жабдықтау нысандарын жылыту маусымына дайындау үшін резервтен 25,4 млрд теңге бөлуді жоспарлап отыр, деп хабарлады Энергетика вице-министрі Сұңғат Есімханов.
«Жылу және электрмен жабдықтау жүйелерінің тұрақты жұмысы үшін өңірлердің өтінімдері бойынша Үкімет резервінен жеті аймаққа 25,4 млрд теңге бөлу қарастырылуда», — деді Есімханов сейсенбі күні өткен Үкімет отырысында. Ол қазіргі уақытта Шығыс Қазақстан, Жетісу және Абай облыстарына қаражаттың бөлінгенін атап өтті.
Мәселен, Талдықорған қаласының оңтүстік-батыс тұрғын ауданында орамдық қазандық құрылысы жүріп жатса, Шығыс Қазақстан облысында Риддер ЖЭО-ның № 5 және 6 қазандықтары мен Риддер қаласындағы жылу желілерінің 12 учаскесі жөнделуде. Абай облысында Семей қаласының 1-ЖЭО мен қазандықтарына жөндеу жұмыстары жүргізілуде.
«Алдағы жылыту маусымынан тұрақты өту үшін министрлік барлық техникалық және ұйымдастырушылық іс-шаралардың орындалуын ұйымдастырды», — деп қадап айтты вице-министр. Есімханов Энергетикалық қадағалау комитеті іс-шаралардың орындалуына қатаң бақылау жүргізетінін айтып түйіндеді.
