Астана. 21 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев Түркістанда мамыр айында өтетін Түркі мемлекеттері ұйымы (ТМҰ) саммитіне сапалы дайындыққа басымдық беруді тапсырды.
«Мамыр айының ортасында Түркістанда Түркі мемлекеттері ұйымы лидерлерінің жоғары деңгейдегі кездесуі жоспарланған. Қазіргі әлемдегі тұрақсыз жағдайда бұл халықаралық іс-шараның маңызы ерекше», – деді Тоқаев. Президенттің сөзін баспасөз қызметі таратты.
«Үкімет пен әкімдік бұл саммитті жоғары деңгейде ұйымдастыруға ерекше көңіл бөлуі қажет», – деп атап өтті мемлекет басшысы.
Түркістан туралы айта келе, Тоқаев бұл өңірде ұлт тағдырын айқындаған маңызды шешімдер қабылданғанын еске салды.
«Түркістан Қазақ хандығының маңызды саяси орталықтарының бірі болғанын, мұнда ел болашағын айқындаған тарихи шешімдер қабылданғанын біз әрдайым есте ұстауымыз керек», – деді президент.
