Шымкент, 26 наурыз. ИНТЕРФАКС – Қазақстан Премьер-министрі Олжас Бектенов Еуразиялық үкіметаралық кеңестің (ЕҮК) шағын құрамдағы отырысында ЕАЭО-ға мүше мемлекеттердің сыртқы сауда мәселелерін және жасанды интеллектті дамыту бастамасын талқылауды ұсынды.
«Құрметті әріптестер, бүгінгі шағын форматтағы кездесуде біз ЕАЭО-ға мүше мемлекеттердің сыртқы саудасына қатысты мәселелерді және жасанды интеллектті дамыту бастамасын іске асыру барысын қарастыруымыз қажет. Біздің отырыс дәстүрлі түрде конструктивті түрде өтіп, барлық тарап үшін өзара тиімді шешімдер қабылдауға мүмкіндік береді деп сенемін», – деді Бектенов.
Ол сондай-ақ отырысқа қатысушыларды құттықтады.
Премьер-министрдің айтуынша, биыл Қазақстан Еуразиялық экономикалық одақ органдарына төрағалық етеді. Осыған байланысты Мемлекет басшысы Қасым-Жомарт Тоқаев ЕАЭО елдері басшыларына жолдауында төрағалықтың негізгі басымдықтарын айқындаған.
«Бұл – экономикалық интеграцияны дамытудың жаңа құралы ретінде жасанды интеллектті пайдалану, кедергісіз орта қалыптастыру және сауда географиясын кеңейту», – деді Бектенов.
Ол шағын құрамдағы отырыстың Digital Qazaqstan – 2026 халықаралық цифрлық форумы қарсаңында өтіп жатқанын атап өтті. Форум «Индустрия 5.0 – өзара іс-қимылдың күші» тақырыбына арналған.
«Бұл символдық мәнге ие, өйткені цифрлық трансформация, жасанды интеллектті енгізу және өнеркәсіпті жаңғырту мәселелері бүгінгі күні ерекше өзекті. Бірлескен күш-жігер арқылы интеграциялық үдерістерге қосымша серпін бере аламыз деп сенемін», – деді ол.
Отырысқа 25–27 наурыз аралығында Қазақстанда жұмыс сапарымен жүрген Ресей Премьер-министрі Михаил Мишустин, Армения Премьер-министрінің орынбасары Мгер Григорян, Беларусь Премьер-министрі Александр Турчин және Қырғызстан Министрлер кабинетінің төрағасы – Президент әкімшілігінің басшысы Адылбек Қасымалиев қатысуда.
Ресей делегациясының құрамында вице-премьер Алексей Оверчук пен цифрлық даму министрі Максут Шадаев бар.
