Астана. 1 сәуір. ИНТЕРФАКС-ҚАЗАҚСТАН — Қазақстан Ұлттық Банкі төрағасы Тимур Сүлейменов жанар-жағармай материалдары (ЖЖМ) мен тұрғын үй-коммуналдық қызметтер тарифтерінің өсуіне қатысты мораторийді алып тастау туралы шешім инфляциялық үрдістерді ескере отырып қабылданатынын мәлімдеді.
«Бүгін немесе жуық арада тұрғын үй-коммуналдық қызмет тарифтері мен ЖЖМ бағаларын қандай деңгейде болатыны туралы шешім жарияланады деп ойлаймын. Бұл шешім біздегі инфляциялық үрдістер толық ескеріліп қабылданады», — деді Сүлейменов сәрсенбі күні Мәжіліс кулуарында журналистерге.
Оның айтуынша, тиісті шешімді Қазақстан Үкіметі қабылдайды. Бұл ретте баға өсімі инфляциядан озып кетпеуі және орынды деңгейде болуы тиіс.
«Бұл мәселеге олар барынша мұқият қарайды деп ойлаймын», — деді Сүлейменов. Оның сөзінше, тарифтер мен ЖЖМ бағасының күрт өсуі инфляцияның жеделдеуіне әкеліп, қалыптасқан инфляцияның баяулау үрдісін жоққа шығаруы мүмкін.
«Біздің ұстанымымыз мынадай: егер тарифтерді көтеру қажеттілігі туындаса, онда оны таңдамалы түрде және шамадан тыс арттырмай жүзеге асыру қажет», — деп атап өтті ол.
Бұған дейін хабарланғандай, Қазақстанда 2025 жылғы 16 қазаннан бастап АИ-92 маркалы бензин мен дизель отыны бағасының одан әрі өсуіне мораторий енгізілген. Қазақстан Энергетика министрлігі бұл бағалар 2026 жылдың көктеміне дейін сақталуы мүмкін екенін мәлімдеген болатын.
Сондай-ақ 2025 жылдың қазан айынан бастап 2026 жылдың бірінші тоқсанының соңына дейін тұтынушылардың барлық санаттары үшін коммуналдық тарифтердің өсуі уақытша тоқтатылған.
