Астана. 3 сәуір. ИНТЕРФАКС-ҚАЗАҚСТАН — Қазақстанның өнеркәсіп және құрылыс министрі Ерсайын Нағаспаев машина жасау саласын дамытудың орта мерзімді негізгі бағыттарын айқындады.
«Бізге ең алдымен толыққанды өндірістік экожүйе қажет. Яғни өндіріс, құрамдас бөлшектерді жеткізу, инженерлік қызмет, білім беру, ғылым және сервистік қызметтер бір-бірінен бөлек емес, біртұтас жүйе ретінде жұмыс істеуі тиіс», — деді министр Қазақстан машина жасаушыларының XIII форумының жалпы отырысында.
Оның айтуынша, министрлік бірнеше басым бағытты белгілеген. Атап айтқанда, заңнамалық және нормативтік базаны жетілдіру, сондай-ақ сапалы инвестициялар тарту көзделіп отыр.
«Біз үшін өз елімізде технологиялық негіз қалыптастыратын инвестициялар маңызды. Бұл жаңа, сапалы жұмыс орындарын ашуға, өндірісті жергіліктендіруге және отандық құзыреттерді дамытуға мүмкіндік береді», — деп түсіндірді министр.
Сонымен қатар, оның айтуынша, шағын және орта бизнесті ірі кәсіпорындардың өндірістік тізбегіне тарту қажет. Тағы бір маңызды бағыт — білікті кадрлар даярлау.
«Инжинирингтік орталықтар құруға ерекше назар аудару қажет. Онсыз қарапайым құрастырудан жоғары қосылған құны бар өнім өндіруге көшу мүмкін болмайды», — деді Ерсайын Нағаспаев.
Қазақстан өнеркәсіп және құрылыс министрлігінің мәліметінше, соңғы 10 жылда машина жасау саласындағы өндіріс көлемі тоғыз есеге өсіп, шамамен 6 трлн теңгеге жеткен. Салада 4 мыңнан астам кәсіпорын жұмыс істейді, ал экспорт көлемі 3 млрд АҚШ долларынан асады.
3 сәуірдегі ресми бағам — 1 АҚШ доллары үшін 472,31 теңге.
