Мадрид. 3 сәуір. ИНТЕРФАКС — Дүниежүзілік денсаулық сақтау ұйымы (ДДҰ) мүше мемлекеттерді Парсы шығанағы аймағындағы қақтығыстан зардап шеккен елдерге жедел көмек көрсету үшін 30,3 млн АҚШ доллары көлемінде қаржы бөлуге шақырды.
Ұйымның мәлімдеуінше, бұл қаражат әскери іс-қимылдар, халықтың жаппай көшуі және құрбандар санының артуы салдарынан үлкен жүктеме түскен денсаулық сақтау жүйелерін қолдауға бағытталады.
ДДҰ деректеріне сәйкес, Таяу Шығыста 4,3 млн-нан астам адам өз үйлерін тастап кетуге мәжбүр болған, мыңдаған адам қаза тауып, ондаған мың адам жарақат алған. Медициналық мекемелер қызметкерлері жарақат алғандарға көмек көрсетумен қатар, созылмалы ауруларды емдеу және ана мен бала денсаулығын сақтау сияқты негізгі қызметтерді де жалғастыруға тырысуда.
Сұралған қаржы ең алдымен Ливан, Иран, Ирак, Сирия және Иорданияға бағытталады. Сонымен қатар ол жеткізу тізбектерін нығайтуға, логистиканы жақсартуға және негізгі дәрі-дәрмектер мен медициналық жабдықтарды жеткізуге жұмсалмақ.
ДДҰ өкілдерінің айтуынша, қосымша ресурстар бөлінбесе, ең көп зардап шеккен елдерде қажетті медициналық қызметтер мен қолда бар мүмкіндіктер арасындағы алшақтық ұлғая береді.
