Астана. 7 сәуір. Интерфакс-Қазақстан – Қазақстан Президенті Қасым-Жомарт Тоқаев Вьетнам Коммунистік партиясы Орталық комитетінің бас хатшысы То Ламды ел президенті болып сайлануымен құттықтады, деп хабарлады сейсенбі күні мемлекет басшысының баспасөз қызметі.
«Сайлаудағы жеңісіңіз қоғам тарапынан Вьетнамның саяси және экономикалық дамуына, сондай-ақ халықаралық аренада ұлттық мүдделерін қорғауға бағытталған стратегиялық бастамаларыңызға жоғары қолдау бар екенін көрсетеді. Сіздің дана басшылығыңызбен ел жаңа жетістіктерге жететініне сенімдімін», – делінген құттықтау жеделхатында.
Қ. Тоқаев Вьетнамның Азиядағы Қазақстанның маңызды серіктестерінің бірі екенін атап өтіп, екі ел халықтарының игілігі үшін стратегиялық әріптестікті одан әрі кеңейтуге сенім білдірді.
