*** Кир Стармер Трамппен Ормуз бұғазындағы кеме қатынасын қалпына келтірудің нақты жоспарын талқылады
Вашингтон. 10 сәуір. ИНТЕРФАКС – АҚШ президенті Дональд Трамп сәрсенбі күні НАТО-ның бас хатшысы Марк Рютте-мен кездесу барысында альянс мүшелерінен Ормуз бұғазының қауіпсіздігін қамтамасыз етуге көмектесу үшін шұғыл әрі нақты шаралар қабылдауды талап етті, деп хабарлайды CNN еуропалық дипломатиялық дереккөздерге сілтеме жасап.
«Бір дипломаттың айтуынша, Трамп бұл міндеттемелерді бірнеше күн ішінде қабылдауды талап еткен. Тағы біреуі бұл мәселенің тек АҚШ үшін ғана емес, Еуропа үшін де шұғыл екенін атап өтті», – деп хабарлайды телеарна.
Дипломаттың сөзінше, Рюттенің Трампқа НАТО одақтастары АҚШ пен Израильдің Иранға қарсы операциясына «толықтай таң қалғанын» түсіндіруі маңызды болған. Сонымен қатар ол альянс елдері Ормуз бұғазын ашуға ықпал ету үшін коалиция аясында жұмыс істеп жатқанын жеткізген.
Бұған дейін бейсенбі күні Вашингтондағы Рональд Рейган институтында сөйлеген сөзінде Рютте НАТО қажет болған жағдайда Ормуз бұғазындағы кеме қатынасына қатысты болашақ стратегияны әзірлеуге көмектесе алатынын айтқан.
«Өткен сейсенбіде 34 мемлекеттің өкілдері Ормуз бұғазы бойынша нақты жоспарлар әзірлеу үшін жиналды. Егер НАТО көмектесе алса, ол сол жерде болады», – деді ол.
Сонымен қатар, қазіргі уақытта Катарда жүрген Ұлыбритания премьер-министрі Кир Стармер бейсенбі кешінде Трамппен телефон арқылы сөйлесіп, Ормуз бұғазындағы кеме қатынасын қалпына келтіру мәселесін талқылады.
«Премьер-министр Парсы шығанағы елдерінің көшбасшыларымен және аймақтың әскери стратегтерімен жүргізген келіссөздері туралы айтты. Онда Ормуз бұғазында кеме қатынасының еркіндігін қалпына келтіру қажеттігі, сондай-ақ Ұлыбританияның серіктестерді тиімді жоспар әзірлеу үшін біріктіру бағытындағы күш-жігері сөз болды», – делінген Ұлыбритания премьерінің кеңсесі таратқан хабарламада.
Хабарламаға сәйкес, Стармер мен Трамп Ормуз бұғазында кеме қатынасын мүмкіндігінше тез қалпына келтіру үшін нақты іс-қимыл жоспарын әзірлеу қажеттігін талқылады.
