Астана. 10 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев ұлы философ Әл-Фараби есімімен аталатын жаңа орден тағайындау бастамасын көтерді.
«Осы салтанатты жиында тағы бір жақсы жаңалықпен бөліскім келеді. Ұлан-ғайыр Ұлы даламыз әлемге көптеген көрнекті тұлғаларды сыйлады. Солардың ішінде бүкіл әлемге танымал философ Әл-Фарабидің орны ерекше. Оның мұрасы – өркениеттің шыңы, бүкіл адамзатқа ортақ баға жетпес құндылық. Осыған байланысты мемлекеттік наградалар жүйесінде лайықты орын алатын “Әл-Фараби” орденін тағайындау қажет деп санаймын», – деді Тоқаев жұма күні Астанада ғалымдармен кездесу барысында.
Президенттің сөзін мемлекет басшысының баспасөз қызметі таратты.
«Бұл жоғары марапат білім мен ғылым, мәдениет және рухани өмір салаларында елеулі жетістіктерге жеткен азаматтарға беріледі», – деп атап өтті мемлекет басшысы.
Оның айтуынша, биыл қазан айында Республика күні қарсаңында алғаш рет «Мейірім», «Қожа Ахмет Ясауи» және «Әл-Фараби» ордендері табысталады.
