Астана. 10 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев елде жаңа бір палаталы парламент – Құрылтайға сайлау тамыз айында өтетінін мәлімдеді.
«Конституция күшіне енген бойда мен бір палаталы Құрылтайға сайлау өткізу туралы Жарлыққа қол қоямын. Сайлау биылғы жылдың тамыз айында өтеді», – деді Тоқаев жұма күні Астанада ғалымдармен кездесу барысында.
Президенттің сөзінің мәтінін мемлекет басшысының баспасөз қызметі таратты.
Президенттің айтуынша, ол сайлау күнін әдейі алдын ала жариялап отыр. Бұл саяси партиялардың жоспарлау көкжиегін нақтылап, сайлау науқанына сапалы дайындалуына жеткілікті уақыт беру үшін қажет.
«Осылайша партиялардың сайлаушылармен тиісті жұмыс жүргізуіне жеткілікті уақыты, яғни шамамен бес айы болады», – деп есептейді Қазақстан басшысы Қасым-Жомарт Тоқаев.
15 наурызда Қазақстанда жаңа Конституцияны қабылдау бойынша республикалық референдум өтті. Орталық сайлау комиссиясының мәліметінше, дауыс беруге қатысқандардың 87,15%-ы жаңа Негізгі заңды қолдаған. Конституция 2026 жылғы 1 шілдеден бастап күшіне енеді.
Жаңа Конституциядағы негізгі жаңалықтардың бірі – «Құрылтай» деп аталатын бір палаталы парламенттің енгізілуі. Ол 145 депутаттан тұрады және тек партиялық тізім бойынша сайланады.
