Астана. 23 сәуір. «Интерфакс-Қазақстан» — Қазақстан Президенті Қасым-Жомарт Тоқаев пен ДДҰ бас директоры Тедрос Адханом Гебрейесус Астанада өткен кездесуде Қазақстан мен Дүниежүзілік денсаулық сақтау ұйымы арасындағы ынтымақтастықтың қазіргі жағдайы мен келешегін талқылады. Бұл туралы бейсенбі күні мемлекет басшысының баспасөз қызметі хабарлады.
Хабарламада айтылғандай, кездесу барысында тараптар климат пен денсаулық саласындағы бірлескен зерттеулер жүргізу, цифрлық трансформация бастамаларын ілгерілету және денсаулық сақтау жүйесіне жасанды интеллект енгізу мәселелерін қарастырды.
Сондай-ақ, Тедрос Адханом Гебрейесус Президентке Қазақстанға дәрілік заттардың айналымын реттеу саласында ДДҰ-ның жетілгендіктің 3-деңгейі берілгенін растайтын хатты табыстады. Бұл ұлттық бақылау жүйесінің сенімділігі халықаралық деңгейде мойындалғанын білдіреді.
Баспасөз қызметінің мәліметінше, Қазақстан ТМД елдері арасында алғаш рет және ДДҰ-ның Еуропалық өңірінде төртінші болып осындай деңгейге қол жеткізді.
