Астана. 23 сәуір. «Интерфакс-Қазақстан» — Қазақстан Парламенті Сенаты бейсенбі күні өткен жалпы отырыста «Қазақстан Республикасы Үкіметі мен Түркия Республикасы Үкіметі арасындағы әскери мүлік пен жеке құрамды Қазақстан Республикасы мен Түркия Республикасының әуе кеңістігі арқылы транзиттеу туралы келісімді ратификациялау туралы» заңды мақұлдады.
Аталған заң бұған дейін Мәжіліс тарапынан қабылданған болатын. Осылайша, құжат Парламент тарапынан тұтастай қабылданды деп есептеліп, Қазақстан Президентінің қол қоюына жолданады.
Көрсетілген келісім 2024 жылғы 11 қыркүйекте қол қойылған.
Қазақстан Қорғаныс министрінің орынбасары Аскар Мустабеков бұған дейін бұл келісім екі мемлекет әуе кеңістігі арқылы әскери мүлік пен жеке құрамның транзитін жүзеге асыру шарттарын құқықтық тұрғыдан реттеу мақсатында жасалғанын мәлімдеген болатын.
Оның айтуынша, транзит уәкілетті органдар беретін жылдық немесе бір реттік рұқсат негізінде жүзеге асырылады.
Жылдық дипломатиялық рұқсат жыл сайын беріліп, мемлекеттердің барлық әскери-көліктік әуе кемелеріне қолданылады. Ал бір реттік рұқсат жылдық дипломатиялық рұқсат аясынан тыс жүзеге асырылатын ұшуларға беріледі. Рұқсат алу үшін тараптар дипломатиялық арналар арқылы ресми сұрау жолдауы тиіс.
Сонымен қатар, әрбір мемлекет транзитке берілетін кез келген рұқсаттан бас тарту, сондай-ақ егер сұралған әскери мүлік пен жеке құрам транзиті келісім талаптарына сәйкес келмейді немесе ұлттық қауіпсіздікке қатер төндіреді деп есептелсе, берілген рұқсаттың күшін тоқтату немесе жою құқығын сақтайды.
