Астана. 23 сәуір. «Интерфакс-Қазақстан» — Қазақстан Парламенті Сенаты бейсенбі күні өткен жалпы отырыста «Қазақстан Республикасы мен Халықаралық валюта қоры арасындағы Кавказ, Орталық Азия және Моңғолия үшін әлеуетті дамыту жөніндегі өңірлік орталыққа қатысты өзара түсіністік туралы меморандумды ратификациялау туралы» заңды мақұлдады, деп хабарлайды «Интерфакс-Қазақстан» агенттігінің тілшісі.
Аталған заң бұған дейін Мәжіліс тарапынан қабылданған болатын. Осылайша, құжат Парламент тарапынан тұтастай қабылданды деп есептеліп, Президенттің қол қоюына жолданды.
Меморандум 2024 жылғы қазанда Вашингтон қаласында қол қойылып, Алматы қаласында орналасқан өңірлік орталықтың қызметін реттейді.
Бұған дейін Ұлттық банк төрағасы Тимур Сулейменов Қазақстанда ХВҚ орталығын орналастыру елдің әлеуметтік-экономикалық дамуына ықпал ететінін, сондай-ақ экономикалық саясат саласындағы ұлттық және институционалдық әлеуетті нығайтатынын атап өткен болатын.
Орталық өз жұмысын 2021 жылғы 1 ақпанда онлайн форматта бастаған, ал ресми ашылуы 2023 жылғы маусымда өтті. Ол Қазақстан, Армения, Әзербайжан, Грузия, Қырғызстан, Моңғолия, Тәжікстан, Түрікменстан және Өзбекстан елдерінің мемлекеттік қызметшілеріне макроэкономика, ақша-несие және бюджеттік саясат, қаржылық реттеу мен қадағалау, макроэкономикалық статистика салаларында білім және тәжірибе алмасуға мүмкіндік береді.
Тимур Сулейменов мәліметінше, бүгінгі таңда орталық шамамен 615 іс-шара өткізіп, 4,6 мың адамды оқытқан, оның ішінде 1,3 мыңы — Қазақстан азаматтары.
Меморандумға сәйкес, орталық директорының еңбекақысы, әлеуметтік кепілдіктері мен тұрғын үй шығындарын ХВҚ өтейді. Қалған шығыстар бенефициар елдер мен донор серіктестердің қаржылық жарналары есебінен қаржыландырылады.
