Астана. 23 сәуір. «Интерфакс-Қазақстан» — Қазақстан Президенті Қасым-Жомарт Тоқаев ел азаматтарын Ұлттық кітап күнімен құттықтады.
«Барша отандастарымды Ұлттық кітап күнімен құттықтаймын! Қазіргі заманда кітап ісі ауқымды өзгерістерді бастан өткеруде, дегенмен кітаптар әлі де рухани-адамгершілік құндылықтар әлеміне бастайтын сенімді бағдар болып қала береді. Классикалық көркем шығармалар болсын, немесе бүгінгі күннің өзекті мәселелерін қозғайтын басылымдар болсын, кітап оқу мәдениетінің біртіндеп қайта жанданып, әсіресе жастар арасында танымал үрдіске айналып келе жатқанын байқап отырмын», — деп жазды Президент бейсенбі күні Instagram әлеуметтік желісіндегі парақшасында.
Мемлекет басшысы оқу мәдениеті ұлт сапасының маңызды көрсеткіші ретінде жалпы цифрландыру және жасанды интеллект үстемдік етіп отырған жағдайда да халқымыздың мінез-құлық кодексінің ажырамас бөлігі болып қалуы тиіс екенін атап өтті.
Сондай-ақ Қасым-Жомарт Тоқаев алдағы екі апта ішінде оқу мәдениетін дамытуға және оқитын, зияткер ұлт қалыптастыруға жағдай жасауға бағытталған шаралар айқындалатын жарлыққа қол қоятынын мәлімдеді.
