Астана. 4 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Sinovation Ventures және 01ai компанияларының бас директоры Ли Кай Фуды қабылдады. Бұл туралы Мемлекет басшысының баспасөз қызметі хабарлады.
«Сұхбаттасушылар ынтымақтастықты одан әрі дамыту және бірлескен бастамаларды жүзеге асыру мәселелерін талқылады», — делінген дүйсенбі күні таратылған хабарламада.
Әңгімелесу барысында Тоқаев Ли Кай Фудың Қазақстандағы жоғары технологиялар саласын дамытуға қосқан елеулі үлесін атап өтті. Кәсіпкер Жасанды интеллектіні (ЖИ) дамыту жөніндегі кеңестің жұмысына қатысады және Мемлекет басшысының штаттан тыс кеңесшісі болып табылады.
Президент Қазақстанның жасанды интеллект саласында тиімді және практикалық нәтижелерге бағытталған серіктестік қалыптастыруға бейілді екенін растады.
Осы тұрғыда 01.AI және Sinovation Ventures компанияларымен бірқатар салалар бойынша ынтымақтастықты кеңейтуге қызығушылық білдірілді. Атап айтқанда, білім беру бастамалары мен озық құзыреттерді локализациялауға және Қазақстанда орнықты технологиялық экожүйені қалыптастыруға бағытталған жобалар перспективалы болып саналады.
Ли Кай Фу — белгілі кәсіпкер және жасанды интеллект саласындағы сарапшы, венчурлық инвестор, Sinovation Ventures венчурлық қорының және 01ai компаниясының бас директоры. Бұған дейін ол Microsoft, Google және Apple компанияларында басшылық лауазымдарда қызмет атқарған, әлемдегі ЖИ бойынша жетекші мамандардың бірі болып саналады.
Sinovation Ventures — 2009 жылы негізі қаланған, Бейжіңде орналасқан венчурлық фирма. Компания жасанды интеллект технологиясын қолданатын стартаптарға инвестиция салуға маманданған.
01ai — 2023 жылы Ли Кай Фу негізін қалаған жасанды интеллект саласындағы қытайлық компания.
