Астана. 6 мамыр. ИНТЕРФАКС-ҚАЗАҚСТАН – Қазақстан мен Австрияның Ішкі істер министрліктері тараптардың қазіргі заманғы қатерлерге қарсы іс-қимылда күш-жігерін үйлестіру және ынтымақтастықты тереңдету ниетін бекітетін өзара түсіністік туралы меморандумға қол қойды. Бұл туралы сәрсенбі күні Қазақстан ІІМ-нің баспасөз қызметі хабарлады.
Құжатқа Астана қаласында Қазақстан Ішкі істер министрі Ержан Сәденов пен Австрияның Федералдық ішкі істер министрі Герхард Карнердің кездесуі барысында қол қойылды.
«Келіссөздер барысында ынтымақтастықтың негізгі бағыттары қаралды: трансұлттық қылмысқа, есірткінің заңсыз айналымына және киберқылмысқа, экстремизм мен терроризмге қарсы іс-қимыл, қылмыскерлерді іздестіру және экстрадициялау, сондай-ақ көші-қонды бақылау мен қоғамдық қауіпсіздікті қамтамасыз ету мәселелері талқыланды. Ведомстволар арасындағы шарттық-құқықтық базаны кеңейтуге және практикалық тәжірибе алмасуға ерекше назар аударылды», — делінген баспасөз хабарламасында.
Кездесу қорытындысы бойынша қылмысқа қарсы күрес саласындағы ынтымақтастық туралы ведомствоаралық келісімді әзірлеу туралы уағдаластыққа қол жеткізілді.
Баспасөз қызметінің мәліметінше, қол жеткізілген уағдаластықтар қауіпсіздік саласындағы қазақ-австриялық серіктестігін дамытуға қосымша серпін бермек.
