Астана. 18 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Транскаспий халықаралық көлік бағыты (ТХКБ) бойындағы жүк тасымалы көлемінің артуына байланысты контрабанда мен есірткі трафигі қаупі күшейіп отырғанын мәлімдеді.
«Транскаспий халықаралық көлік бағыты Еуразия логистикасының стратегиялық элементіне айналып отыр. Жаһандық сауда тізбектерінің трансформациясы және геосаяси шиеленістің күшеюі жағдайында оның маңызы бірнеше есе арта түсуде.
Сонымен қатар жүк ағындарының ұлғаюы белгілі бір тәуекелдермен қатар жүреді. Әңгіме трансұлттық қылмыс, контрабанда, есірткі және қару-жарақ тасымалы туралы болып отыр», – деді Тоқаев «Орталық Азия – Қытай» форматына қатысушы елдердің ішкі істер және қоғамдық қауіпсіздік министрлерімен кездесуде.
Осыған байланысты Президент өңірлік қауіпсіздіктің тиімді жүйесін қалыптастыру үшін «Орталық Азия – Қытай» форматының әлеуетін толық пайдалану қажеттігін атап өтті.
«Менің ойымша, ішкі істер министрліктері өзара ынтымақтастықты күшейтіп, қауіпсіздік пен қоғамдық тәртіпке қатысты ең өзекті мәселелер бойынша ақпарат алмасуды жандандыруы қажет. Бұл біздің халықтарымыздың сұранысы мен мүддесіне толық сәйкес келеді», – деді Қазақстан басшысы.
Транскаспий халықаралық көлік бағыты (ТХКБ), сондай-ақ Орта дәліз ретінде белгілі, Қытай мен Еуропаны Қазақстан, Каспий теңізі, Әзербайжан, Грузия және Түркия аумағы арқылы байланыстырады.
