Астана. 18 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Орталық Азия елдері мен Қытайдың құқық қорғау органдарын ақпараттық технологиялар саласындағы қылмысқа қарсы күрес әдістерін жетілдіруге шақырды.
«Ақпараттық технологиялар саласындағы қылмыс шекара танымайды, ол біздің елдеріміздің азаматтарына, бизнес құрылымдарына және мемлекеттік органдарына әсер етуде. Гибридтік және ақпараттық технологиялар жалған ақпарат пен фейктерді тарату құралына айналып, өшпенділік тілін насихаттап, жанжалдарды ушықтыруда.
Жасанды интеллект деструктивті күштердің қолында қуатты ақпараттық қаруға айналып отыр, оның салдары аса қауіпті», – деді Тоқаев «Орталық Азия – Қытай» форматына қатысушы елдердің ішкі істер және қоғамдық қауіпсіздік министрлерімен кездесуде.
«Құқыққа қайшы контент, қазіргі тілмен айтқанда, заңсыз мазмұн үздіксіз ағынмен таралуда. Осыған байланысты қолданыстағы өзара іс-қимыл тетіктерін жүйелі түрде жетілдіріп, киберқылмысқа қарсы проактивті іс-қимылды күшейту қажет», – деп атап өтті Қазақстан басшысы.
