Астана. 18 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Орталық Азия – Қытай» форматына қатысушы елдердің ішкі істер және қоғамдық қауіпсіздік министрлерімен өңірлік қауіпсіздікті қамтамасыз ету, трансұлттық қылмысқа, есірткінің заңсыз айналымына, киберқылмыс пен экстремизмге қарсы іс-қимыл мәселелерін талқылады. Бұл туралы мемлекет басшысының баспасөз қызметі хабарлады.
«Трансұлттық ұйымдасқан қылмыс барған сайын икемді әрі өзара ықпалдасқан сипат алып келеді. Киберқылмыс миллиардтаған доллар шығын келтіретін жоғары табысты жаһандық индустрияға айналды. Цифрлық орта қылмыстық топтардың қызметін үйлестіру, заңсыз кірістерді жылыстату және мемлекеттік шекараларды мойындамайтын шабуылдар жасау құралы ретінде жиі пайдаланылуда. Маңызды көлік және сауда бағыттарының тоғысқан жерінде орналасқан Орталық Азия өңірі трансұлттық қылмыстық желілердің назарында қалып отыр», – деді Тоқаев.
Осыған байланысты, оның айтуынша, трансұлттық ұйымдасқан қылмысқа, есірткінің заңсыз айналымына және адам саудасына қарсы күрес мәселелері ерекше өзектілікке ие болып отыр.
«Тек күш-жігерді біріктіру, ақпарат алмасу, институционалдық өзара іс-қимылды нығайту және заманауи технологияларды енгізу арқылы ғана біз бұл қатерлерге тиімді қарсы тұра аламыз деп сенемін. Қазақстан қауіпсіздік саласындағы өңірлік және халықаралық ынтымақтастықты тереңдетуді дәйекті түрде қолдайды. Біз ашық диалогқа, озық тәжірибемен алмасуға және азаматтарымызды қорғауға әрі мемлекеттердің орнықты дамуын қамтамасыз етуге бағытталған бірлескен шешімдер әзірлеуге дайынбыз», – деді Қазақстан Президенті.
Мемлекет басшысы трансұлттық қылмыстық топтардың қаржылық ағындарын бұғаттау басым міндеттердің бірі екенін атап өтті.
«Экстремистік идеялардың таралуына, интернет арқылы террористік топтарға тартуға тосқауыл қоюды күшейтіп, террористік актілерге дайындық әрекеттерін ерте кезеңде анықтау қажет. Мен атап өткен барлық қатерлер өзара тығыз байланысты, оларға қарсы күрес кешенді әрі үйлестірілген күш-жігерді талап етеді. “Орталық Азия – Қытай” форматы елдеріміздің қауіпсіздігін қамтамасыз етуге бағытталған нақты әрі үйлесімді шаралардың үлгісіне айналады деп сенемін», – деді Тоқаев.
Қазақстан Президентімен кездесуге Қытай Халық Республикасының қоғамдық қауіпсіздік министрі Ван Сяохун, Қырғызстан ішкі істер министрі Улан Ниязбеков, Тәжікстан ішкі істер министрі Рамазон Рахимзод, Түрікменстан ішкі істер министрі Мухаммет Хыдыров және Өзбекстан ішкі істер министрі Азиз Ташпулатов қатысты.
Олар Астанаға «Орталық Азия – Қытай» форматындағы бейінді ведомстволардың екінші отырысына қатысу үшін келген.
