Астана. 18 мамыр. ИНТЕРФАКС-ҚАЗАҚСТАН – Қазақстан Үкіметі экономиканың жыл сайынғы тұрақты өсімін 5-6% деңгейінде қамтамасыз етіп, 2029 жылға қарай жалпы ішкі өнім көлемін 450 млрд долларға жеткізуді жоспарлап отыр. Бұл туралы ұлттық экономика вице-министрі Арман Қасенов мәлімдеді.
«Біздің мақсатымыз – алдағы жылдары да экономикалық өсімнің жоғары қарқынын 5-6% деңгейінде сақтап, 2029 жылға қарай ЖІӨ көлемін 450 млрд долларға жеткізу», – деді Қасенов дүйсенбі күні Сенаттағы үкімет сағатында.
Оның айтуынша, соңғы үш жыл ішінде ел экономикасы жоғары өсім қарқынын көрсетті. «Әрбір жыл бойынша нақты мәндегі ЖІӨ өсімі 5%-дан асты. Бұл – өте жоғары көрсеткіш және әлемдік орташа өсім қарқынынан 1,5 еседен астам жоғары», – деп атап өтті вице-министр.
Сондай-ақ оның мәліметінше, 2017 жылдың басынан бері елдің нақты мәндегі жиынтық ЖІӨ өсімі 39%-ды құраған. Бұл кезеңдегі әлемдік ЖІӨ-нің нақты өсімі 30% деңгейінде болды. Ең жоғары өсім қарқыны соңғы жылдары, атап айтқанда 2023 жылдан бері байқалып отыр.
2025 жылы Қазақстанның ЖІӨ өсімі 6,5%-ды құраса, 2026 жылдың қаңтар-сәуір айларында бұл көрсеткіш 3,6% болды. Елдің премьер-министрі Олжас Бектенов 2026 жылы экономиканың тұрақты өсімін 5%-дан жоғары деңгейде қамтамасыз етуді тапсырды.
18 мамырдағы ресми валюта бағамы – 1 АҚШ доллары үшін 470,17 теңге.
