«Atameken Business» арнасының хабарлауынша, қазақстандықтардың қақтығыс аймақтарына баруына шектеу қойылмақ. Премьер-министр Олжас Бектенов депутаттардың сауалына берген жауабында азаматтардың қауіпті өңірлерге шығуын уақытша шектеудің заңнамалық тетіктері әзірленетінін мәлімдеді. Мұндай шараларды енгізу қажеттілігі эвакуация жұмыстары жүріп жатқан кезде кейбір қазақстандықтардың қауіпті аймақтарға ұшуын тоқтатпай, қосымша салмақ түсіргенімен байланысты болып отыр. Мысалы, эвакуациялық жұмыстар кезеңінде Алматыдан Дубай мен Шарджаға 191 адам ұшып кеткен. Қақтығыс ушыққан сәттен бастап қауіпті аймақтардан 66 рейс ұйымдастырылса, оның 27-сі бюджет есебінен төленді. Өңірдегі жағдай шиеленіскен тұста ол жерде 4 мыңға жуық ұйымдасқан турист болған, олардың 3 мыңын орналастыру және тамақтандыру мәселесімен «Туристік Қамқор» қоры айналысты. Сонымен қатар, дағдарыс жағдайларында авиатасымалдаушыларды жұмылдыру тәртібін жетілдіру жоспарлануда. Ал сақтандыру саласындағы МЖӘ (мемлекеттік-жекеменшік әріптестік) аясын кеңейту мәселелері сақтандыру туралы жаңа заң жобасын әзірлеу барысында қарастырылады.
Еуразия24 пікірі:
Қазақстанда азаматтардың еркін жүріп-тұруы және елден шығу құқығы Конституциямен қорғалған негізгі құқықтардың қатарына жатады. Сондықтан заң тұрғысынан мынадай маңызды сұрақ туындайды: егер ел ішінде әскери немесе төтенше жағдай жарияланбаса, шетелдегі қарулы қақтығыс азаматтардың сапарына шектеу қоюға негіз бола ала ма? Бұл — өте күрделі тақырып. Себебі іргелі құқықтарды кез келген шектеу, әдетте, нақты құқықтық негіздерді, рәсімдерді талап етеді. Әйтпесе, өкілеттіктерді асыра пайдалану тәуекелдері туындауы мүмкін: бүгін нақты қақтығыс аймағына шығу шектелсе, ертең «жағдайы тұрақсыз» елдерге, ал бүрсігүні тағы бір субъективті пайымдарға байланысты тыйым салынуы ықтимал. Екінші жағынан, мұның өзіндік қисынды логикасы да бар: егер билік органдары шектеулер туралы, ал авиакомпаниялар мен туроператорлар қатерлер туралы алдын ала ескертсе, неліктен эвакуациялық рейстердің барлық шығыны салық төлеушілердің мойнына түсуі керек ? Бұл жерде мемлекеттің жауапты мәртебесі ғана жеткіліксіз, әсіресе, оның алдын ала ескерту жасағанын ескерсек. Біздің ойымызша, бұл мәселенің тиімді шешімі мұндай қауіпті сапарларға толықтай тыйым салуда емес, қатерлі аймаққа аттанған азаматтың өзіне жауапкершіліктің бір бөлігін жүктеуде жатыр.
