Қазақстанның ЖИ және цифрлық даму министрлігі хабарлауынша: «Түркі мемлекеттері ұйымының Түркістанда өткен бейресми саммитінде Қазақстан цифрлық болашаққа қатысты стратегиялық көзқарасын таныстырды. Бұл бағытта “ғарыш дипломатиясы” нақты нәтиже бере бастағаны атап өтілді. Негізгі жобалардың бірі — CubeSat-12U ғылыми-технологиялық спутнигі. Оны Жасанды интеллект және цифрлық даму министрлігі Әзербайжан, Түркия және Өзбекстан әріптестерімен бірлесіп әзірлеп жатыр. Жоба синергия қағидаты бойынша жүзеге асырылуда. Астанадағы қазақстандық ғарыш саласының мамандары отандық Құрастыру-сынақ кешені базасында спутникті жобалау мен жалпы құрастыруға жауап береді. Өзбекстан қозғалтқыш қондырғысын әзірлесе, Түркия жобаны күн панельдерімен және бағдарламалық қамтамасыз етумен қамтамасыз етеді. Қазіргі уақытта жоба сызба кезеңінен өтіп, жүйелерді нақты құрастыру сатысына көшкен. Спутникті ұшыру келесі жылға жоспарланған. Бұл түркі мемлекеттерінің технологиялық амбициясының маңызды көрсеткішіне айналмақ».
Еуразия24 пікірі:
Түркі мемлекеттері ұйымына мүше елдердің бірлескен ғылыми-технологиялық спутник әзірлеуі түркі интеграциясының жаңа деңгейге көтеріліп келе жатқанын көрсетеді. Әсіресе Қазақстан үшін ғарыш саласы толыққанды технологиялық бағытқа айналып, бұл саладағы құзыретін кезең-кезеңімен күшейтіп келеді. Соңғы жылдары біз «KazSat» байланыс спутниктерін жасап, оларды сәтті пайдаланудан бастап, Астанада жеке құрастыру-сынақ кешенін салуға дейінгі ауқымды жолды жүріп өттік. Енді қалыптасып келе жатқан ғарыш индустриясы үшін бұл — өте берік іргетас. Осы орайда, келесі логикалық қадам — ұлттық жобалардан халықаралық технологиялық кооперацияға көшу. Бұл тұрғыда «CubeSat» жобасы ерекше қызығушылық тудырады, себебі Қазақстан бұл бастаманың жүйе құраушы негізгі орталықтарының біріне айналып отыр. Сондай-ақ, жоба ТМҰ аясындағы саяси серіктестерді ғана емес,нақты өндірістік мүмкіндіктерді біріктіретінімен құнды. Мәселен, Түркия бағдарламалық қамтамасыз ету және энергетикалық шешімдер бойынша алда болса, Өзбекстан — қозғалтқыш қондырғылары, ал Әзірбайжан ғылыми-техникалық кооперация бағытында мықты әлеуетке ие.
