Мәскеу. 19 мамыр. ИНТЕРФАКС – Таиланд Ресейді қоса алғанда, 90-нан астам елдің туристері үшін визасыз режим мерзімін екі есе қысқартады. Мұндай шешім сейсенбі күні өткен Үкімет отырысында қабылданды.
«Туризм және спорт министрі Сурасак Пханчароенворакул сейсенбідегі Министрлер кабинетінің отырысында 90-нан астам елдің азаматтары үшін 60 күндік визасыз бағдарламаның күшін жою туралы шешім қабылданғанын мәлімдеді. Келесі қадам – бұл шара туралы барлық тиісті ведомстволарды хабардар ету», — деп хабарлайды «The Nation» порталы.
Басылымның нақтылауынша, 60 күндік визасыз бағдарламасы тоқтатылатын елдердің барлығы осы жеңілдік енгізілгенге дейінгі келу режиміне қайта көшеді. Олардың көпшілігі үшін, соның ішінде Ресей үшін де бұл – 30 күндік визасыз режим. Ал кейбір елдер үшін визасыз келу мерзімі қысқа мерзімді туризм талаптарына сәйкес келу мақсатында 15 күнге дейін қысқартылуы мүмкін.
«Бұдан былай біз тек туристер санына ғана басымдық бермейміз. Негізгі екпін келу процесін жеңілдетіп, ағымды арттыруға емес, туристердің сапасына жасалуы тиіс. Премьер-министр қауіпсіздікті арттыру және жалпы шетелдік туризмді жақсарту мақсатында виза беру мәселесін мұқият пысықтауды тапсырды», — деді Премьер-министр.
Елге келетін туристер ағынын ынталандыру үшін 60 күндік визасыз жүру мерзімі 2024 жылы енгізілген болатын. Оның күшін жоюға себеп болған факторлардың қатарында Таиландқа визасыз режим аясында туристік емес мақсатпен келетін шетелдіктер санының артуы бар. Сондай-ақ танымал курорттық аймақтардағы жылжымайтын мүлікті Таиланд азаматтары болып табылатын жалған сатып алушылар арқылы шетелдіктерге сату жағдайларының жиілеуі де әсер еткен.
Бұған қоса, Туризм және спорт министрлігінің мәліметінше, саяхатшылардың басым бөлігі Таиландта 60 күннен аз уақыт болады.
«Министрліктің статистикасы көрсеткендей, Таиландқа келетін шетелдік туристердің көбі елде орташа есеппен тоғыз күн ғана аялдайды. Соныдықтан визасыз режимді 30 күнге дейін қысқарту шетелдік туристер ағынына елеулі әсер етпейді деп есептеледі», — деп жазады басылым.
