Астана. 21 мамыр. ИНТЕРФАКС-ҚАЗАҚСТАН — Қазақстанда азаматтар арасында, әсіресе жастар арасында кітап оқу мәдениетін кеңінен насихаттауға бағытталған кешенді шаралар жүзеге асырылады. Бұл туралы Қасым-Жомарт Тоқаев мәлімдеді.
«Біз халқымыздың, әсіресе жастардың арасында кітап оқу мәдениетін кеңінен дәріптеуіміз қажет. Өткен аптада мен кітап оқу мәдениетін дамыту және оқитын ұлт қалыптастыру жөніндегі шаралар туралы арнайы жарлыққа қол қойдым. Бұл маңызды құжаттың басты мақсаты — ұлт сапасын арттыру, яғни адами капиталды дамыту және қоғамның интеллектуалдық әрі мәдени әлеуетін нығайту», – деді Президент мәдениет және өнер қызметкерлерін марапаттау рәсімінде.
Мемлекет басшысы Үкіметке осы бағыттағы шараларды іске асыруды тапсыратынын айтты. Оның ішінде кітапхана ісі мен кітап басу саласына заңнамалық қолдау көрсету де қарастырылған.
«Сонымен қатар “Оқитын ұлт” тұжырымдамасы бекітіледі, “Жылдың 10 оқырманы” республикалық жобасы жүзеге асырылады және бірыңғай қолжетімділігі бар Ұлттық цифрлық кітапхана платформасы іске қосылады. Бұдан бөлек, басқа да маңызды бастамаларды жүзеге асыру жоспарланып отыр», – деді Қасым-Жомарт Тоқаев.
