Астана. 21 мамыр. ИНТЕРФАКС-ҚАЗАҚСТАН — Қасым-Жомарт Тоқаев Екібастұз қаласымен әуе қатынасын дамыту қажет екенін айтып, Асаин Байхановқа жаңа әуежай ашу мәселесін пысықтауды тапсырды. Бұл туралы Мемлекет басшысының баспасөз қызметі хабарлады.
«Қасым-Жомарт Тоқаев Екібастұз қаласымен авиациялық байланысты дамыту мәселесіне ерекше назар аударып, облыс әкіміне жаңа әуежай ашу мүмкіндігін қарастыруды тапсырды. Бұл жобаның жүзеге асуы өңірдің көлік қолжетімділігі мен инвестициялық тартымдылығын едәуір арттырып, облыстың әлеуметтік-экономикалық дамуына жаңа серпін береді», – делінген Президенттің өңір басшысымен кездесуі қорытындысы бойынша таратылған хабарламада.
Кездесу барысында Асаин Байханов Мемлекет басшысына өңірдің 2025 жылғы және 2026 жылдың бірінші тоқсанындағы әлеуметтік-экономикалық дамуы туралы есеп берген. Оның айтуынша, өткен жылдың қорытындысы бойынша Павлодар облысында негізгі көрсеткіштердің барлығы бойынша оң динамика қамтамасыз етілген.
Кездесу қорытындысында Президент инвестиция тарту, әлеуметтік инфрақұрылымды дамыту және инженерлік-коммуналдық кешенді жаңғырту жұмыстарын жалғастыруды тапсырды.
