Астана. 10 маусым. ИНТЕРФАКС-ҚАЗАҚСТАН — Қазақстан Парламентінің Мәжілісі сәрсенбі күні өткен жалпы отырыста Үкімет пен Қазақстан Республикасының Жоғары аудиторлық палатасының 2025 жылғы республикалық бюджеттің атқарылуы туралы есептерін тыңдады.
Отырыс барысында Қазақстанның Қаржы министрі Мәди Такиев 2025 жылдың қорытындысы бойынша ел экономикасы 6,5 пайызға өскенін, ал инфляция деңгейі 12,3 пайызды құрағанын еске салды.
Министрдің мәліметінше, 2025 жылдың соңында мемлекеттік борыш жалпы ішкі өнімнің 22,8 пайызына немесе 36,4 трлн теңгеге тең болған. Республикалық бюджетке түскен түсімдер көлемі 21,4 трлн теңгені құрады. Трансферттерді есептемегендегі меншікті кірістер 15,3 трлн теңгеге жетіп, 17,5 пайызға артқан. Ал республикалық бюджет шығыстарының орындалуы 99 пайызды құрап, 25,5 трлн теңге болған.
Өз кезегінде Жоғары аудиторлық палатаның төрағасы Әлихан Смайылов жалпы ішкі өнім бойынша болжамның 9 трлн теңгеге артық орындалғанына қарамастан, бюджетке 335 млрд теңге көлемінде қаражат түспегенін айтты.
«Мұның бәрі жоспарлаудағы кемшіліктер мен салықтық болжамдардың шамадан тыс оптимистік болуынан туындап отыр», – деді Смайылов Мәжіліс отырысында.
Мемлекеттік аудиторлардың бағалауынша, бюджет тапшылығы әлі де жоғары деңгейде қалып отыр және оны қысқарту жөніндегі жоспарлардың орта мерзімді перспективада жүзеге асуы екіталай.
Сонымен қатар Жоғары аудиторлық палата өткен жылы квазимемлекеттік сектордың экономика мен мемлекеттік қаржы жүйесіне ықпалы айтарлықтай өзгермегенін, керісінше оның бюджетке тәуелділігі күшейгенін атап өтті.
«Жалпы алғанда, бюджет қаражатын игеру үдерісі атқарушылық тәртіптің төмен деңгейімен және нәтижеліліктің шектеулі болуымен сипатталады», – деді Смайылов.
Есептер одан әрі қарау үшін Сенатқа жолданды.
