Астана, 10 маусым. ИНТЕРФАКС-ҚАЗАҚСТАН — Қазақстан Парламенті Мәжілісі сәрсенбі күнгі жалпы отырыста Қазақстан мен Қырғызстан үкіметтері арасындағы елшіліктер мен екі мемлекеттің елшілеріне арналған резиденциялар қажеттілігі үшін Астана және Бішкек қалаларындағы ғимараттар мен жер учаскелерін өтеусіз пайдалануға өзара беру туралы келісімді ратификациялау жөніндегі заңды қабылдады.
Мәжілістің бейінді комитетінің мәліметінше, аталған нысандар 49 жыл мерзімге кейіннен ұзарту құқығымен беріледі.
Құжатта жер учаскелері мен жылжымайтын мүлік нысандарын беру тәртібі мен шарттары айқындалған. Сонымен қатар келісімде көрсетілген жылжымайтын мүлік екі елде де алынатын барлық салықтар мен алымдардан босатылады.
Келісімге сәйкес, тараптар ғимараттарды салуға, жөндеуге және күтіп ұстауға, сондай-ақ коммуналдық қызметтерді төлеуге байланысты барлық шығындарды өздері көтереді. Төлемдер қолданыстағы тарифтерге сәйкес жүзеге асырылады.
Құжат одан әрі қарау үшін Сенатқа жолданды.
