Астана. 11 маусым. ИНТЕРФАКС-ҚАЗАҚСТАН — Қазақстан Республикасы Парламентінің Сенаты бейсенбі күні өткен жалпы отырысында екі оқылымда «Қазақстан Республикасының кейбір заңнамалық актілеріне машина жасау және көлік саласын дамыту мәселелері бойынша өзгерістер мен толықтырулар енгізу туралы» заң қаралып, мақұлданды.
Сенаттың мәліметінше, заң отандық машина жасау саласының инвестициялық тартымдылығын арттыруға, қазақстандық өндірушілердің бәсекеге қабілеттілігін күшейтуге, жаңа технологияларды енгізуге, экспорттық әлеуетті ұлғайтуға, өндірістік үдерістерді жетілдіруге және ел ішіндегі қосылған құн үлесін арттыруға бағытталған.
Атап айтқанда, заң көлік құралдары мен ауыл шаруашылығы техникасын өндірушілер үшін кәдеге жарату алымын төлеу бойынша өзара есепке алу тетігін енгізуді көздейді. Сонымен қатар тауар өндірушілер мен импорттаушылар артық немесе қате төленген кәдеге жарату алымын сөзсіз қайтарып алу құқығына ие болады. Бұл норма өндірушілердің мүліктік құқықтарын қорғауға және қаражатты қайтару рәсімін жеңілдетуге мүмкіндік береді.
Техниканың қолжетімділігін арттыру, тұтынушылық сұранысты ынталандыру және қаржы секторын дамыту мақсатында жеке тұлғаларға арналған лизинг шарттарын реттеу көзделген. Оның ішінде лизингтік компанияларға қойылатын талаптар мен айыппұлдардың ең жоғары мөлшері белгіленеді. Айыппұл көлемі 10 пайыздан аспауға тиіс.
«Қазақстан Республикасының әуе кеңістігін пайдалану және авиация қызметі туралы» заңға халықаралық стандарттар мен талаптарға, соның ішінде Federal Aviation Administration талаптарына сәйкестендіруге бағытталған өзгерістер енгізіледі.
Сенат қорытындысында атап өтілгендей, бұл түзетулер Қазақстан мен Америка Құрама Штаттары арасында тікелей әуе қатынасын ашу үшін қажетті халықаралық авиациялық қауіпсіздік бағалауынан өтуге мүмкіндік береді.
Машина жасау саласын дамыту аясында заң өнеркәсіптік кластерлер институтын енгізуді де қарастырады. Әзірлеушілердің пікірінше, бұл норма индустриялық-инновациялық қызмет субъектілерінің бірлескен жобаларды іске асыруына және салаға ортақ мәселелерді шешуіне серпін береді.
Сонымен қатар қара және түсті металл сынықтары мен қалдықтарының айналымын реттеуге қатысты түзетулер енгізілді. Атап айтқанда, қарапайым серіктестіктерден және жеке тұлғалардан пайдаланылған теміржол рельстерін, теміржол төсемінің элементтерін, жылжымалы құрам бөлшектерін және кәріз құдықтарының қақпақтарын қабылдауға тыйым салынады. Бұл шектеу кәсіпкерлік қызметпен айналысатын жеке тұлғаларға, сондай-ақ шаруа немесе фермер қожалықтарына қолданылмайды.
Құжат Мемлекет басшысының қол қоюына жолданды.
