Астана. 11 маусым. ИНТЕРФАКС-ҚАЗАҚСТАН — Қазақстан Республикасы Парламентінің Сенаты бейсенбі күні өткен жалпы отырысында екі оқылымда қаралған «Телекоммуникациялар нарығын және деректерді өңдеу орталықтарын дамыту мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заң мақұлданды.
Бұған дейін хабарланғандай, түзетулер байланыс нысандарын, оның ішінде антенна-діңгек құрылыстарын, тіректер мен өзге де инфрақұрылымды салу үшін жер учаскелерін беру тәртібін жеңілдетуді көздейді. Сонымен қатар ерекше қорғалатын табиғи аумақтарда белгіленген тәртіппен байланыс желілерін салуға рұқсат беріледі.
Заңға сәйкес ұялы байланыс абоненттік құрылғыларын верификациялау функциясы мемлекеттік монополияға беріледі. Бұл өкілеттік мемлекеттік радиожиілік қызметіне жүктеледі.
Түзетулер азаматтарды әлеуметтік және мемлекеттік маңызы бар мобильді қосымшаларға тәулік бойы және тарифсіз қолжетімділікпен қамтамасыз етуді де қарастырады. Мұндай қосымшалардың қатарына, мысалы, eGov Mobile кіреді.
Сонымен қатар заңмен деректерді өңдеу орталықтарына (ДӨО) қойылатын талаптар жаңартылады. Атап айтқанда, жеке және заңды тұлғалар ДӨО құрылысының басталуы және пайдалануға берілуі туралы уәкілетті органды хабардар етуге міндетті болады.
Құжаттың жекелеген нормалары спутниктік байланысты дамытуға, геостационарлық емес спутниктерді пайдалану шарттарын жаңартуға, сондай-ақ Қазақстанның бірыңғай телекоммуникациялар желісіне кіретін Заттар интернеті (IoT) желілерінің қызметін реттеуге бағытталған.
Заң Мемлекет басшысының қол қоюына жолданды.
