Астана. 14 маусым. ИНТЕРФАКС-ҚАЗАҚСТАН – Астанада жақында ғана тіркелген «Әділет» партиясының екінші съезі басталды. Оның барысында делегаттар партияның Аманат партиясымен бірігу мәселесін қарайды, деп хабарлайды агенттік тілшісі.
Съезд күн тәртібіне төрт мәселе енгізілген. Олардың қатарында «Әділет» партиясының «Аманат» партиясына қосылуы туралы мәселе де бар. Бұл туралы съезд модераторы Рауан Кенжеханұлы мәлімдеді.
Бұған дейін жұма күні өткен съезде «Аманат» партиясының мүшелері жаңа саяси күш – Әділет партиясымен бірігу туралы шешім қабылдаған болатын.
«Аманат» партиясы (2022 жылға дейін Nur Otan) – Қазақстандағы ең ірі саяси ұйым. Ол Парламент Мәжілісінде және жергілікті мәслихаттарда басым орынға ие.
Партия 1999 жылы Қазақстанның тұңғыш президенті Нұрсұлтан Назарбаевтың бастамасымен құрылған. Ол ұзақ жылдар бойы партияны басқарды.
2022 жылы Президент Қасым-Жомарт Тоқаев партияның атауын «Аманат» деп өзгерту бастамасын көтеріп, сондай-ақ мемлекеттік аппарат пен партиялық құрылымдардың ықпалдасуына жол бермеу мақсатында президенттің өкілеттік мерзімі кезінде партия мүшелігін тоқтату міндетін заң жүзінде бекітуді ұсынған болатын.
«Әділет» партиясы 2026 жылдың сәуір айында бастамашыл топтың негізінде құрылған. Мамыр айының басында оның төрағасы болып Қазақстан Президенті Әкімшілігінің бұрынғы басшысы Айбек Дәдебай сайланды. Партия маусым айында мемлекеттік тіркеуден өтті.
Еске салайық, биыл тамыз айында Қазақстанда бір палаталы парламент – Құрылтай сайлауы өтеді.
