Астана. 25 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күні өткен жалпы отырыста «Қазақстан Республикасындағы кедендік реттеу туралы» кодекске өзгерістер мен толықтырулар енгізу жөніндегі заңды екі оқылымда қарап, мақұлдады.
Ұлттық экономика бірінші вице-министрі Азамат Әмрин бұған дейін заң жобасында бірнеше маңызды жаңалық қарастырылғанын хабарлаған болатын.
Атап айтқанда, үшінші елдердегі шетелдік интернет-алаңдардан халықаралық пошта жөнелтілімдері арқылы жеке тұлғаларға жеткізілетін тауарлар жеке санатқа бөлініп, «электрондық сауда тауарлары» мәртебесін алады.
Сонымен қатар «электрондық сауда операторы» ұғымы енгізіледі. Бұдан бөлек, кедендік декларацияның жаңа түрі – электрондық сауда декларациясы қолданысқа енгізілмек.
Қазіргі кезде шетелдік интернет-дүкендерден сатып алынған тауарлар жеке пайдалануға арналған тауарлар ретінде қарастырылады және олар тек бажсыз әкелу нормасы асып кеткен жағдайда ғана декларацияланады.
Заңға сәйкес, электрондық сауда тауарлары тек жеке тұлғалардың жеке пайдалануына арналған болып есептеледі және кәсіпкерлік қызмет жүргізуге арналмайды.
Сонымен қатар мұндай тауарлар сауда айналымына жатқызылмайтындықтан, ресми статистикада толық көлемде көрініс таппай келеді.
Азамат Әмриннің айтуынша, электрондық сауда тауарларының барлығын декларациялау шетелдік интернет-платформалар арқылы сатып алынатын өнімдердің толық статистикасын қалыптастыруға мүмкіндік береді.
Осылайша заң халық үшін кедендік рәсімдерді жеңілдетуге, электрондық сауда операторлары арқылы декларациялау тәртібін реттеуге, импорт құрылымы жөніндегі толық әрі нақты статистиканы қалыптастыруға, трансшекаралық электрондық сауда саласын жүйелеуге және нарықтың ашықтығын арттыруға бағытталған.
Құжат Мемлекет басшысының қол қоюына жолданды.
