Астана. 25 маусым. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күні өткен жалпы отырыста экология және экономиканың жекелеген салаларын жетілдіру мәселелері бойынша заңнамалық түзетулерді екінші оқылымда қарап, өз өзгерістерімен Мәжіліске қайтарды.
Заң жобасын талқылау барысында Қазақстанның ұлттық үлесін орындау мақсатында Париж келісімінің нарықтық тетіктері негізінде жүзеге асырылатын жобалардың нәтижелерін есепке алу тәртібін реттейтін Экологиялық кодекстің жаңа 288-1-бабына қатысты нормалар қайта қаралды.
Сенат қорытындысында комитет аталған баптың 6-тармағына халықаралық климаттық қаржыландыруды тартуға қолайлы жағдай жасау және климаттық жобалардың инвестициялық тартымдылығын арттыру мақсатында түзетулер енгізуді қажет деп тапқаны атап өтілген.
Бұған дейін хабарланғандай, заң аясында экологиялық ақпаратты жинақтайтын Бірыңғай ұлттық экологиялық деректер банкін құру көзделген. Оның құрамына мониторинг жүйелерінің мәліметтері мен өндірістік экологиялық бақылау нәтижелері енгізіледі. Бұл ақпараттың ашықтығын қамтамасыз етіп, бақылау тиімділігін арттыруға мүмкіндік береді.
Сондай-ақ құжат орман және жайылымдық көміртек офсеттері институтын енгізуді қарастырады. Бұл орман өсіру жобаларына жеке инвестициялар тартуға және елдің климаттық міндеттемелерін орындауға ықпал етеді.
Бұдан бөлек, қалдықтарды басқару жүйесін жетілдіру шаралары енгізіледі.
Рұқсат етілмеген қоқыс орындарын жою өкілеттігі жергілікті атқарушы органдарға беріледі. Сонымен қатар қатты тұрмыстық қалдықтарды жинау, тасымалдау, сұрыптау және көму саласындағы тарифтік саясат өңірлік ерекшеліктер ескеріле отырып жүзеге асырылады.
Құжатта ұлттық гидрометеорологиялық қызметтің жұмысын жетілдіру де қарастырылған. «Қазгидромет» РМК-ның мемлекеттік функциялары мен бәсекелестік негізде көрсетілетін қызметтері нақты ажыратылмақ. Бұл бюджет қаражатын тиімді пайдалануға және қызмет көрсету сапасын арттыруға мүмкіндік береді.
Заңда белгіленген нормадан тыс шығарындылар үшін жауапкершілік нақтыланып, мұндай эмиссияларды есептеу тәртібі айқындалады.
Сонымен қатар қайта өңделген шикізатты пайдаланатын отандық өндірушілерді қолдау тетіктері енгізіледі. Бұл қайта өңдеу өнеркәсібінің дамуына және айналым экономикасын қалыптастыруға ықпал етеді.
Жалпы алғанда, заң мемлекеттік экологиялық саясаттың тиімділігін арттыруға, табиғи ресурстарды ұтымды пайдалануға және мемлекет, бизнес пен қоғам арасындағы жауапты әріптестікті нығайтуға бағытталған.
Құжат енді Мәжілісте қайта қаралады.
