Астана. 25 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев жұма күні Парламент палаталарының бірлескен отырысына қатысып, өткен кезеңнің қорытындыларын шығарып, елдің алдағы даму бағытына қатысты негізгі міндеттерді жариялайтынын мәлімдеді.
«Мен Парламент палаталарының бірлескен отырысына қатысамын. Осы тарихи кезеңде атқарылған жұмыстардың қорытындысын жасап, еліміздің жаңа даму кезеңіндегі негізгі мақсаттар мен міндеттерге тоқталамын. Қазақстан халқы жасампаз әрі жаңашыл ұлт ретінде болашаққа нық қадам басып келеді», – деді Мемлекет басшысы бейсенбі күні бұқаралық ақпарат құралдары қызметкерлерін марапаттау рәсімінде.
Президенттің айтуынша, бұл оқиға қарсаңында Парламенттің VIII сессиясы өз жұмысын аяқтайды.
Қасым-Жомарт Тоқаев отандық бұқаралық ақпарат құралдарының халықаралық медиа кеңістіктегі бәсекеге қабілеттілігін арттыру маңызды екенін де атап өтті.
Сонымен қатар ол цифрлық платформалардың қарқынды дамуына қарамастан, дәстүрлі ақпарат құралдары қоғамдағы маңызын сақтап қалатынына сенім білдірді.
«Ақпараттық даңғаза, үстірт пікірлер мен мазмұны жұтаң контент көбейген кезеңде сапалы әрі өзекті журналистиканың құны бұрынғыдан да арта түседі. Сондықтан дәстүрлі бұқаралық ақпарат құралдары жақын болашақта қоғам үшін маңызды бағыт-бағдар беруші рөлінен айырылмайды деп есептеймін», – деді Президент.
Қазақстанда 1 шілдеден бастап республикалық референдумда қабылданған жаңа Конституция күшіне енеді. Осыған байланысты 1995 жылғы 30 тамызда қабылданған қолданыстағы Конституцияның күші тоқтатылады.
Сонымен бірге Мәжіліс пен Сенаттан тұратын қос палаталы Парламенттің өкілеттігі де аяқталады.
2026 жылғы 15 наурызда өткен референдумда қабылданған жаңа Конституцияның негізгі жаңалықтарының қатарында вице-президент лауазымын енгізу, Парламенттің орнына бір палаталы Құрылтай институтын құру және оның құрамын партиялық тізімдер бойынша сайлау қарастырылған. Құрылтай 145 депутаттан тұрады.
Бұдан бөлек, заң шығару бастамасы құқығына ие «Халық кеңесі» атты жоғары консультативтік орган құрылып, Қазақстан халқы Ассамблеясы таратылатын болады.
Жаңа Конституция күшіне енгеннен кейін бір ай ішінде Құрылтай сайлауы жарияланып, екі айдың ішінде өткізілуі тиіс. Бұған дейін Қасым-Жомарт Тоқаев сайлаудың тамыз айында өтетінін мәлімдеген болатын.
