Астана. 2 шілде. ИНТЕРФАКС-ҚАЗАҚСТАН – Еуропалық қайта құру және даму банкі (ЕҚДБ) 2026 жылы Қазақстанға жалпы көлемі 1,3 млрд еуро инвестиция салуды жоспарлап отыр. Бұл туралы ЕҚДБ президенті Одиль Рено-Бассо мәлімдеді.
Мемлекет басшысының баспасөз қызметінің хабарлауынша, Қазақстан Президенті Қасым-Жомарт Тоқаев бейсенбі күні Астанада өткен Президент жанындағы Шетелдік инвесторлар кеңесінің 38-пленарлық отырысы аясында Одиль Рено-Бассомен кездесті.
«Қазақстан – біздің қатысуымыз бен қызметіміз үшін аса маңызды елдердің бірі. Биыл инвестициялық белсенділіктің өте жоғары деңгейін байқап отырмыз. Жалпы құны 1 млрд АҚШ долларынан асатын жобалар бойынша келісімдерге қол қойылды. Дайындық кезеңіндегі жобаларды ескерсек, биылғы инвестиция көлемі 1,3 млрд еуроға жетеді деп күтіп отырмыз. Бұл Қазақстандағы қызметіміз басталғалы бергі ең жоғары инвестициялық көрсеткіш болады», – деді ЕҚДБ басшысы.
Одиль Рено-Бассо банктің Қазақстанға инфрақұрылымды, көлік байланысын, ирригация жүйесін және энергетика саласын дамыту бағытында қолдау көрсетуді жалғастыруға дайын екенін растады.
Сондай-ақ банк жеке секторды қолдауға, шағын және орта кәсіпкерлікті дамытуға, инвестициялық жобаларды қаржыландыруға ерекше назар аудармақ. Басым бағыттардың бірі – аса маңызды шикізат материалдары саласына инвестиция тарту.
Кездесу барысында тараптар цифрландыру мен жасанды интеллект салаларындағы ынтымақтастықты кеңейтудің маңызын атап өтті.
ЕҚДБ Қазақстан экономикасын цифрлық трансформациялау мақсатында инновациялық экожүйені дамытуға қолдау көрсетуге әзір екенін білдірді.
Қасым-Жомарт Тоқаев Қазақстан Үкіметі мен ЕҚДБ арасында Қазақстанның орнықты дамуына жәрдемдесуге бағытталған ынтымақтастықты кеңейту жөніндегі негіздемелік әріптестік келісіміне қол қойылуын құптады.
Кездесуде соңғы 30 жыл ішінде ЕҚДБ Қазақстанда жалпы құны 11 млрд еуродан асатын 354 жобаны қаржыландырғаны атап өтілді. Қазіргі уақытта банктің Қазақстандағы инвестициялық портфелі жалпы құны 3,1 млрд еуродан асатын 131 жобаны қамтиды.
