Берлин. 2 шілде. ИНТЕРФАКС – Германия канцлері Фридрих Мерц бейсенбі күні зейнетақы жүйесін, салық салуды және еңбек заңнамасын реформалауға, сондай-ақ бюрократиялық рәсімдерді қысқартуға бағытталған шаралар пакетін таныстырды. Оның айтуынша, бұл бастамалар экономикалық өсімді жеделдетуге, жаңа жұмыс орындарын ашуға және халықты әлеуметтік қорғау деңгейін сақтай отырып, елдің бәсекеге қабілеттілігін арттыруға ықпал етеді. Бұл туралы Reuters агенттігі хабарлады.
Мерцтің айтуынша, үкімет 34 тармақтан тұратын реформалар пакетінің негізгі бөлігін биылғы жылдың соңына дейін парламентте қабылдауды жоспарлап отыр.
Жоспарға сәйкес, ай сайынғы табысы 600 еуродан асатын, екі баласы бар жұмыс істейтін отбасылар үшін салықтық жеңілдіктер енгізіледі. Атап айтқанда, салықтық шегерімдер көлемі ұлғайтылады. Бұл шара ішінара жылдық салық салынатын табысы кемінде 280 мың еуроны құрайтын азаматтар үшін табыс салығының ең жоғары мөлшерлемесін 45 пайыздан 47 пайызға дейін көтеру есебінен қаржыландырылады.
Құжатта алдағы ондаған жыл ішінде зейнеткерлік жасты кезең-кезеңімен ұлғайту да қарастырылған.
Сонымен қатар әлеуметтік төлемдер саласындағы алаяқтыққа қарсы күресті күшейту жоспарланып отыр. Ол үшін мемлекеттік органдар арасындағы деректер алмасу кеңейтіліп, бақылау тетіктері жетілдіріледі.
Реформалар пакетінде қолжетімді тұрғын үй құрылысын дамыту мақсатында федералдық тұрғын үй компаниясын құру және ипотекалық несиелеуді ынталандыру үшін ипотека рәсімдеу талаптарын жеңілдету де көзделген.
Еңбек қатынастары саласында еңбекке уақытша жарамсыздыққа байланысты жұмыстан қалу күндерін азайту мақсатында қызметкерлер енді сырқаты туралы телефон арқылы хабарлай алмайды. Олар жұмысқа шықпаған алғашқы күннен бастап медициналық анықтама ұсынуға міндетті болады.
Сондай-ақ компанияларға жаңа қызметкерлермен 48 айға дейінгі мерзімге еңбек шарттарын жасасуға кеңірек мүмкіндік беріледі. Бұдан бөлек, жоғары жалақы алатын қызметкерлерді өтемақы төлеу арқылы жұмыстан босату рәсімдеріне қатысты талаптарды икемді ету көзделген.
Үкімет есептілік пен құжат айналымына қойылатын талаптарды қысқартып, корпоративтік комплаенс талаптарын жеңілдетуді де жоспарлап отыр. Соның аясында федералдық мемлекеттік басқару органдары қызметкерлерінің санын шамамен 8 пайызға қысқарту көзделген.
Сонымен қатар үкімет автомобиль өнеркәсібі, химия және фармацевтика, «жасыл» технологиялар, машина жасау, аккумуляторлар мен жартылай өткізгіштер өндірісі, сондай-ақ жасанды интеллект салаларын қоса алғанда, экономиканың стратегиялық маңызды секторларын қолдау жөніндегі шараларды ұсынбақ.
