Астана. 2 шілде. ИНТЕРФАКС-ҚАЗАҚСТАН – Қазақстан аса маңызды минералдар саласында инвесторлармен ынтымақтастықты кеңейту үшін нормативтік-құқықтық базаны жетілдіріп, саланы реттеу тетіктерін жаңғыртып жатыр. Бұл туралы Қазақстан Президенті Қасым-Жомарт Тоқаев мәлімдеді.
Мемлекет басшысы бейсенбі күні Президент жанындағы Шетелдік инвесторлар кеңесінің 38-пленарлық отырысында сөйлеген сөзінде аса маңызды пайдалы қазбалар жаңа индустриялық дәуірдің стратегиялық ресурсына айналып келе жатқанын айтты. Оның сөзінше, осы бағыттағы басым міндеттердің бірі – аса маңызды минералдар саласында ашық әрі технологиялық экожүйе қалыптастыру.
«Біз жер қойнауын пайдалану саласындағы бірыңғай платформаны іске қостық. Соның нәтижесінде лицензиялау мен жер қойнауын пайдаланушылардың міндеттемелерінің орындалуын бақылауға қатысты 22 мемлекеттік қызмет автоматтандырылды», – деді Президент.
Тоқаевтың айтуынша, бүгінде бірыңғай ұлттық цифрлық қорға бұрын тек қағаз және магниттік тасымалдағыштарда сақталған 4,7 миллионнан астам архивтік геологиялық құжат пен материал цифрлық форматқа көшірілді.
Сонымен қатар Қазақстан тарихи геологиялық деректерді заманауи машинамен оқылатын форматқа жедел көшіру үшін жасанды интеллект технологияларын қолдана бастады.
«Астанада сирек жер металдары жөніндегі өңірлік зерттеу орталығын құру бастамасы аясында халықаралық инвесторларға жоғары дәлдіктегі геологиялық деректер ұсынатын бірыңғай орталық қалыптастырылып жатыр», – деді Мемлекет басшысы.
