Астана. 8 шілде. ИНТЕРФАКС-ҚАЗАҚСТАН – «Ауыл» халықтық-демократиялық патриоттық партиясы Құрылтай депутаттығына кандидаттар тізімін тіркеу үшін Қазақстан Республикасының Орталық сайлау комиссиясына (ОСК) тапсырды. Бұл туралы партияның баспасөз қызметі сәрсенбі күні хабарлады.
«2026 жылғы 6 шілдеде өткен партияның кезектен тыс съезінде Құрылтай депутаттарын сайлауға қатысу үшін партиялық кандидаттар тізімі бекітілді. (…) Бүгін партия партиялық тізімді тіркеу үшін Қазақстан Республикасының Орталық сайлау комиссиясына қажетті құжаттарды ұсынды», – делінген хабарламада.
Партияның мәліметінше, кандидаттар тізімі сайлау заңнамасының талаптарына сәйкес қалыптастырылып, жастарға, әйелдерге және мүгедектігі бар адамдарға арналған белгіленген квоталар сақталған.
Келесі кезеңде Орталық сайлау комиссиясы ұсынылған құжаттардың заң талаптарына сәйкестігін қарайды.
Бұған дейін хабарланғандай, «Ауыл» партиясы 69 кандидаттан тұратын тізімді бекіткен. Оның құрамына партия төрағасы Қайрат Айтуғанов, партияның бұрынғы төрағасы әрі Мәжіліс депутаты Серік Егізбаев, VIII сайланған Мәжіліс депутаттары және партия атынан президенттікке бұрын ұсынылған Қарақат Әбден мен Жигули Дайрабаев енгізілген.
Сондай-ақ тізімге агроөнеркәсіптік кешен, аграрлық ғылым, білім беру, денсаулық сақтау, биотехнология, мемлекеттік басқару, кәсіпкерлік, кәсіподақ ұйымдары салаларының өкілдері, сондай-ақ өңірлік мәслихат депутаттары енген.
Қазіргі уақытта Орталық сайлау комиссиясына кандидаттар тізімін тіркеуге «Ауыл» партиясымен қатар Respublica партиясы да ұсынды.
Қазақстанда Құрылтай сайлауы 23 тамызға белгіленген. Заң шығару билігін жүзеге асыратын жоғары өкілді орган – Құрылтай алғаш рет сайланбақ. Бұған дейін елде Мәжіліс пен Сенаттан тұратын екі палаталы Парламент жұмыс істеді.
Құрылтай 145 депутаттан тұрады. Олар бірыңғай жалпыұлттық сайлау округі бойынша пропорционалды сайлау жүйесі негізінде сайланады, яғни сайлаушылар партиялық тізімдерге дауыс береді. Құрылтай депутаттары жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Мандаттарды иелену үшін саяси партиялар бірыңғай жалпыұлттық сайлау округі бойынша дауыс беру қорытындысында 5 пайыздық межеден өтуі тиіс.
Қазіргі уақытта Қазақстанда жеті саяси партия тіркелген. Олар: жақында құрылған «Әділет» партиясы (оған маусым айының ортасында қайта ұйымдастыру арқылы биліктегі Amanat партиясы қосылды), «Ақ жол» демократиялық партиясы, Қазақстан халық партиясы, «Ауыл» халықтық-демократиялық патриоттық партиясы, Жалпыұлттық социал-демократиялық партия, «Байтақ» жасылдар партиясы және Respublica партиясы. Бұрынғы екі палаталы Парламентте алты партияның өкілдігі болды.
