Астана. 9 шілде. ИНТЕРФАКС-ҚАЗАҚСТАН – Қазақстан халық партиясы (ҚХП) Құрылтай (бір палаталы парламент) сайлауына арналған партиялық кандидаттар тізімін ұсыну туралы құжаттарды Орталық сайлау комиссиясына тапсырды. Бұл туралы бейсенбі күні ОСК-ның баспасөз қызметі хабарлады.
Осы аптада өткен съезде ҚХП Құрылтай депутаттығына ұсынылатын 72 кандидаттан тұратын партиялық тізімді бекіткен болатын. Партия төрағасы Нұрсұлтан Шоқановтың айтуынша, тізімдегі кандидаттардың 75%-ы ерлер, 25%-ы әйелдер. Кандидаттардың орташа жасы – 45 жас. 35 жасқа дейінгі жастардың саны – 9 адам немесе 12%, ал 55 жастан асқандар – 19 адам немесе 26%.
Тізімге партия төрағасы Нұрсұлтан Шоқанов, VIII сайланған Парламент Мәжілісіндегі ҚХП фракциясының төрт депутаты, Сенаттың бұрынғы депутаты, Қазақстандағы Әйелдер істері жөніндегі ұлттық комиссия төрағасының орынбасары Ләззат Сүлеймен, медицина саласының өкілдері, педагогтер, актриса, қоғам қайраткерлері және басқа да тұлғалар енгізілген.
Қазіргі уақытта Орталық сайлау комиссиясына кандидаттар тізімін тіркеуге Қазақстан халық партиясымен қатар «Ақ жол», Respublica, «Ауыл» және Жалпыұлттық социал-демократиялық партиясы (ЖСДП) құжат тапсырды.
Қазіргі таңда Қазақстанда жеті саяси партия тіркелген. Жоғарыда аталғандардан бөлек, жақында құрылған «Әділет» партиясы және «Байтақ» жасылдар партиясы бар. Бұрынғы екі палаталы Парламентте алты партияның өкілдігі болған. Қазақстан халық партиясының Мәжілістегі фракциясы бес депутаттан тұрған.
Қазақстанда Құрылтай сайлауы 23 тамызға белгіленген. Заң шығару билігін жүзеге асыратын жоғары өкілді орган – Құрылтай алғаш рет сайланбақ. Бұған дейін елде Мәжіліс пен Сенаттан тұратын екі палаталы Парламент жұмыс істеді.
Құрылтай 145 депутаттан тұрады. Олар бірыңғай жалпыұлттық сайлау округі бойынша пропорционалды сайлау жүйесі негізінде сайланады, яғни сайлаушылар партиялық тізімдерге дауыс береді. Құрылтай депутаттары жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Мандаттарды иелену үшін саяси партиялар бірыңғай жалпыұлттық сайлау округі бойынша дауыс беру қорытындысында 5 пайыздық межеден өтуі тиіс.
