Астана. 10 шілде. ИНТЕРФАКС-ҚАЗАҚСТАН – Қазақстанның агроөнеркәсіптік кешені (АӨК) өнімдерінің экспорты 2026 жылдың қаңтар–сәуір айларында 3 млрд АҚШ долларын құрады. Бұл өткен жылдың сәйкес кезеңімен салыстырғанда 36%-ға көп. Бұл туралы Ауыл шаруашылығы министрі Айдарбек Сапаров Президент Қасым-Жомарт Тоқаевпен кездесуде мәлімдеді.
Президенттің баспасөз қызметінің хабарлауынша, Ауыл шаруашылығы министрлігі 2026 жылдың қорытындысы бойынша АӨК өнімдерінің экспортын 7,2 млрд АҚШ долларына дейін жеткізуді жоспарлап отыр.
Айдарбек Сапаров Мемлекет басшысына агроөнеркәсіптік кешеннің бірінші жартыжылдықтағы даму қорытындылары туралы да баяндады. Оның айтуынша, алты айда азық-түлік өндірісі 14,7%-ға артқан. Ауыл шаруашылығы өнімдерінің нақты көлем индексі 4,4%-ға өсті. Оның ішінде өсімдік шаруашылығы – 7,7%-ға, мал шаруашылығы 4,4%-ға ұлғайған.
Министр агроөнеркәсіптік кешендегі өңделген өнім үлесін 70%-ға дейін жеткізу, ауыл шаруашылығы тауарын өндірушілерді жеңілдетілген несиелеуді кеңейту, ауыл шаруашылығы техникасының лизингін дамыту және саланы цифрландыру бағытындағы жұмыстар жалғасып жатқанын жеткізді.
Министрліктің болжамынша, 2026 жылдың қорытындысында ауыл шаруашылығының жалпы өнімі 5,9%-ға, азық-түлік өндірісі 9,5%-ға, сусын өндірісі 10,5%-ға өседі. Ал салаға тартылатын негізгі капиталға инвестиция көлемі 2,2 трлн теңгеге жетеді деп күтілуде.
Кездесу қорытындысында Қасым-Жомарт Тоқаев агроөнеркәсіптік кешеннің тиімділігін арттыруды, қосылған құны жоғары өнім өндірісін ұлғайтуды, саланың экспорттық әлеуетін кеңейтуді және елдің азық-түлік қауіпсіздігін нығайтуды тапсырды.
