Астана. 10 шілде. ИНТЕРФАКС-ҚАЗАҚСТАН – Маусым айының ортасында қайта ұйымдастыру арқылы құрамына биліктегі Amanat партиясы қосылған «Әділет» («Әділдік») партиясы жұма күні Астанада өткен съезде Құрылтай (бір палаталы парламент) депутаттығына ұсынылатын 186 кандидаттан тұратын партиялық тізімді бекітті. Бұл туралы «Интерфакс-Қазақстан» агенттігінің тілшісі хабарлады.
Тізімге партия төрағасы, Президент әкімшілігінің бұрынғы басшысы Айбек Дәдебай, сондай-ақ Президент әкімшілігі басшысының бірінші орынбасары Ерлан Қарин енгізілген. Сонымен қатар кандидаттар қатарында Қазақстан Парламентінің бұрынғы депутаттарының едәуір бөлігі бар.
Партия атынан ұсынылған кандидаттардың қатарында «Қазақтелеком» ұлттық компаниясының басқарма төрағасы Бағдат Мусин, белгілі кәсіпкер, «Qarmet» АҚ мен Allur компаниялар тобы директорлар кеңесінің төрағасы Андрей Лаврентьев, Қазақстан Республикасы Президентінің телерадиокешенінің директоры Раушан Қажыбаева, Президент әкімшілігі басшысы хатшылығының меңгерушісі Қаныш Төлеушин, Қазақстандағы Бала құқықтары жөніндегі уәкіл Динара Зәкиева және Жоғары аудиторлық палатаның бұрынғы төрағасы Наталья Годунова да бар.
Бұдан бөлек, партиялық тізімге журналистер, саясаттанушылар, қоғам қайраткерлері және кәсіпкерлер енгізілген.
Бұрынғы екі палаталы Парламентте кейіннен «Әділет» партиясының құрамына енген Amanat партиясының фракциясы 98 депутаттан тұратын Мәжілісте 40 мандатқа ие болып, ең ірі парламенттік фракция саналған.
Бұған дейін Қазақстанда тіркелген барлық саяси партиялар Құрылтай сайлауына қатысатынын мәлімдеген болатын. Respublica партиясы – 76, «Ақ жол» демократиялық партиясы – 63, «Ауыл» халықтық-демократиялық патриоттық партиясы – 69, Қазақстан халық партиясы – 72, Жалпыұлттық социал-демократиялық партиясы – 33, ал «Байтақ» жасылдар партиясы 51 кандидаттан тұратын тізімдерін бекітті.
Қазақстанда Құрылтай сайлауы 23 тамызға белгіленген. Заң шығару билігін жүзеге асыратын жоғары өкілді орган – Құрылтай алғаш рет сайланбақ. Бұған дейін елде Мәжіліс пен Сенаттан тұратын екі палаталы Парламент жұмыс істеді.
Құрылтай 145 депутаттан тұрады. Олар бірыңғай жалпыұлттық сайлау округі бойынша пропорционалды сайлау жүйесі негізінде сайланады, яғни сайлаушылар партиялық тізімдерге дауыс береді. Құрылтай депутаттары жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Мандаттарға ие болу үшін саяси партиялар бірыңғай жалпыұлттық сайлау округі бойынша дауыс беру қорытындысында 5 пайыздық межеден өтуі тиіс.
Қазіргі уақытта Қазақстанда жеті саяси партия тіркелген. Олар: «Әділет» партиясы (оған маусым айының ортасында қайта ұйымдастыру арқылы Amanat партиясы қосылды), «Ақ жол» демократиялық партиясы, Қазақстан халық партиясы, «Ауыл» халықтық-демократиялық патриоттық партиясы, Жалпыұлттық социал-демократиялық партиясы, «Байтақ» жасылдар партиясы және Respublica партиясы. Бұрынғы екі палаталы Парламентте «Байтақтан» басқа алты партияның өкілдігі болған.
