Гонконг. 12 шілде. ИНТЕРФАКС – Қытай билігі «Бави» тайфунының жақындауына байланысты 2,4 миллионнан астам тұрғынды қауіпсіз жерге көшірді. South China Morning Post басылымының хабарлауынша, тайфун жексенбіге қараған түні елдің шығысындағы Тайчжоу қалалық округіне жеткен.
Түн ортасына қарай тайфун әкелген нөсер жаңбыр Вэньчжоу қалалық округінде жауды. Дауыл ошағына жақын аймақта желдің жылдамдығы сағатына 108–117 шақырымға дейін жетті. Қытайдың оңтүстік және шығыс өңірлерінің бірқатарында қатты жауын-шашын тіркелді.
Қазіргі уақытта тайфунның күші әлсіреп, солтүстік бағытқа қарай жылжып барады. Синоптиктер жексенбі күні де бірқатар өңірде жаңбыр жауады деп болжауда.
Басылымның мәліметінше, қолайсыз ауа райына байланысты 2,8 мыңнан астам әуе рейсі тоқтатылуы мүмкін. Атап айтқанда, Шанхайдың Пудун және Хунцяо халықаралық әуежайлары жалпы рейстердің шамамен 30 пайызына тең 650-ден астам рейсті тоқтатуға дайындалған. Ал Ханчжоу-Сяошань халықаралық әуежайында жексенбі күні 296 рейс кейінге шегерілді. Тайфун әлсірегеннен кейін күндіз әуе қатынасын біртіндеп қалпына келтіру жоспарланып отыр.
Жалпы Шанхайда және Цзянсу провинциясында орналасқан 45 әуежайда найзағай мен нөсер жаңбырға байланысты ескерту жарияланды. Сондай-ақ Фуцзянь, Чжэцзян, Хайнань провинцияларынан және Гуанси-Чжуан автономиялық ауданынан рейстердің тоқтатылғаны туралы хабарламалар түсті.
Global Times басылымының хабарлауынша, бұған дейін Бейжіңнің Шоуду және Дасин халықаралық әуежайларында да бірқатар рейс тоқтатылған.
Тайфун теміржол қатынасына да әсер етті. Жолаушылардың қауіпсіздігін қамтамасыз ету мақсатында Ханчжоу қаласының Батыс теміржол вокзалы жексенбі күні пойыз қозғалысын уақытша тоқтатты. Сонымен қатар Фуцзянь және Цзянси провинциялары арқылы өтетін кейбір жолаушылар пойыздарының қозғалысы кейінге қалдырылды.
Қытайдың Метеорологиялық басқармасы жазғы туристік маусымның қызған шағында қолайсыз ауа райы көлік қатынасына, ауыл шаруашылығы өндірісіне және коммуналдық қызметтердің жұмысына кері әсер етуі мүмкін екенін ескертіп, жергілікті билікті алдын алу шараларын күшейтуге шақырды. Тұрғындарға ауа райы болжамын қадағалап, аса қажеттілік болмаса, жолға шықпау ұсынылды.
