«Әділет» партиясының мәліметінше, ұйымдастыру мәселелері қаралғаннан кейін партияның ІІІ кезектен тыс съезінде делегаттар сайлауалды бағдарламаның негізгі басымдықтарын талқылап, Қазақстан Республикасы Құрылтайы депутаттығына ұсынылатын кандидаттардың партиялық тізімін бекітті. «Жаңа Конституция еліміздің дамуына жаңа мүмкіндіктер ашты. Ендігі міндет – сол мүмкіндіктерді тиімді пайдалану. Мемлекетті алға бастыратыны – азаматтардың білімі, бастамашылдығы, жауапкершілігі мен адал еңбегі. Бүгін біз алдағы сайлауда партияның атынан түсетін кандидаттардың құрамын бекіттік. Бұл – ел мүддесі жолында еңбек етуге дайын, ортақ мақсатты көздейтін азаматтардан құралған команда. Олар бос уәде беруді немесе кінәліні іздеуді мақсат етпейді. Негізгі міндеті – елдің келешегі үшін нақты жұмыс істеу», – деді партия төрағасы Айбек Дәдебай.
Еуразия24 пікірі:
Алдағы Құрылтай сайлауына қатысатын саяси партиялардың ішінде ең көп кандидат ұсынған – «Әділет» партиясы. Партиялық тізімге барлығы 186 үміткер енгізілді. Amanat партиясымен бірігу нәтижесінде «Әділеттің» құрамына VIII шақырылымдағы Мәжілістің көптеген депутаттары өтті. Соның ішінде Amanat фракциясының 19 депутаты енді Құрылтай депутаттығына «Әділет» партиясының атынан үміткер ретінде тіркелді. Айта кетейік, Мемлекет басшысы 2025 жылғы қыркүйекте Оқу-ағарту министрі қызметіне тағайындаған Жұлдыз Сүлейменова да бұған дейін VIII шақырылымдағы Мәжілістің депутаты болған. Партиялық тізімге бұған дейін Парламент құрамында болмаған, елге белгілі бірқатар тұлғалар да енгізілген. Олардың қатарында партия төрағасы Айбек Дәдебай, «Қазақтелеком» АҚ басқарма төрағасы, цифрлық даму саласының бұрынғы министрі Бағдат Мусин, Бала құқықтары жөніндегі уәкіл Динара Зәкиева және Жоғары аудиторлық палатаның бұрынғы төрайымы, «Қазақстан темір жолы» ҰК» АҚ тәуелсіз директоры Наталья Годунова бар. Сонымен қатар кандидаттар қатарынан Энергетика вице-министрі Сұңғат Есімхановты, Qarmet және Allur компаниялары директорлар кеңесінің төрағасы Андрей Лаврентьевті, Президент әкімшілігінің қызметкері Қаныш Төлеушинді көруге болады. Сондай-ақ Қазақстан Республикасының Мемлекеттік кеңесшісі Ерлан Қарин де партия қатарына қосылып, Құрылтай депутаттығына үміткер ретінде ұсынылды. Партиялық тізімге қоғамның әртүрлі салаларында танылған өзге де тұлғалар енгізілген. Атап айтқанда, журналист Ульяна Әшімова, Қазақстанның Дағдарыс орталықтары одағының төрайымы Зүлфия Байсақова, Qarmet компаниясының бас директоры Вадим Басин, Сенат депутаттары Нұрлан Бекназаров пен Ольга Перепечина, «Әділ сөз» халықаралық сөз бостандығын қорғау қорының президенті Қарлығаш Жаманкұлова, журналист әрі кәсіпкер Рауан Кенжеханұлы және саясаттанушы Марат Шибұтов партиялық тізімнен орын алған.
